Guri drejt Belgjikës për 500 mijë €, tentohen Lilaj dhe Dita
Sindrit Guri po shënon gati në çdo takim dhe kjo gjë ndodhi edhe dje ndaj Lushnjës. Në 11 ndeshjet e fundit në kampionat ka arritur të shënojë 13 herë. Për 24- vjeçarin kanë ardhur në adresë të Kukësit shumë oferta, por dy janë ato që kanë bindur lojtarin dhe janë afër kërkesave të presidentit Gjici: nga Gent dhe Sënt Truiden. Këto klube i ofrojnë 700 dhe 500 mijë euro Kukësit për kartonin e shkodranit, por Gjici kërkon 1 milion euro. Gazeta mëson se kreu i klubit verilindor ka pasur një takim me Gurin para ndeshjes me Lushnjën në Kukës, ku kanë diskutuar për të ardhmen e tij. Shkodrani i ka bërë me dije kreut të klubit se dëshiron të largohet në një prej dy ekipeve belge e se ofertat e tyre janë shumë serioze. Palët kanë rënë dakord në parim e pritet që në fillim të javës çdo gjë të konkretizohet dhe Guri të transferohet në Belgjikë. Kukësi do përfitojë 500 mijë euro dhe 20 për qind të kartonit në rast se klubi belg e shet lojtarin më vonë. Sënt Truiden duket se është më afër blerjes së sulmuesit shkodran.
Afrime - Me largimin e Gurit pritet të mbushen arkat e klubit verilindor. Drejtuesit e klubit po punojnë që të kompletojnë ekipin për Kupat e Europës. Pakult kërkon futbollistë që të bëjnë diferencën. Do ruhet boshti i ekipit, Frashëri, kapiteni Shameti, Musolli, Rrumbullaku, Hoxha, Alla, Zderiç, Dzaria, Kale, Shkodra, e në bazë të nevojave do afrohen lojtarë që të bëjnë diferencën. Gazeta mëson ekskluzivisht se Kukësi pëlqen tre futbollistë në kampionatin shqiptar. Bëhet fjalë për dy mesfushorët e Skënderbeut, Sabjen Lilaj e Bruno Dita. Në mbarim të kampionatit, të dy lojtarët mund të transferohen te Kukësi, duke qenë se dhe kontratat iu përfundojnë me Skënderbeun. Të dy janë pëlqyer nga trajneri Pakult dhe austriaku ka dhënë "OK-in" që përgjegjësit e merkatos të hyjnë në tratativa. Afrimi i tretë pritet të jetë Rexhinaldo i Laçit, i cili ka qenë dhe më parë në lupën e verilindorëve.