Bojkoti i sjell fat Vllaznisë B
Miqtë shpresojnë te “finalja” që luajnë në fund, një lojtar përfundon në spital
ë një ndeshje të luftuar, Vllaznia B ka siguruar minimalisht "play- out"- in, duke shmangur rrezikun e rënies direkt në Kategorinë e Dytë. Kuqeblutë kanë fituar ndaj Tërbunit të Pukës me rezultatin 2- 1. Ndeshja u luajt në fushën sportive "Reshit Rusi" në Shkodër dhe u karakterizua nga një luftë e fortë mes dy ekipeve. Kjo ndeshje për të dyja ekipet kishte një rëndësi për shkak të vazhdimësisë dhe luftës për mbijetesë. Shkodranët gjatë javës nuk janë stërvitur plotësisht për shkak të problemeve që kanë me pagat dhe vetëm pas një premtimi të administratorit Astrit Gjyrezi pranuan të futen në përballjen ndaj pukjanëve.
NDESHJA - Rezultati zhbllokohet shumë shpejt, teksa është Hallunaj ai, i cili realizon golin e parë që në minutën e 9-të. Ky gol i jep zemër Vllaznisë B, e cila kërkon golin e dytë për të fituar sigurinë në fushën e lojës. Ai që mendon për të dyfishuar shifrat për vendësit është Hajdari. Shkodrani shënon në minutën e 19-të, duke çuar në 2-0 rezultatin. Me këtë fitore vendësit janë më të qetë, ndërsa miqve u duhet shumë punë për të barazuar. Pjesa e parë mbyllet me avantazhin e dy golave të Vllaznisë. Në pjesën e dytë është Tërbuni më kërkues dhe pukjanët nuk dorëzohen lehtësisht. Shumë shpejt në minutën e 54-t është sulmuesi Jurgen Gjini, ai që ngushton diferencën në 2-1 dhe rihap edhe njëherë këtë sfidë mes dy ekipeve. Pas golit të Tërbunit miqtë pretendojnë të shënojnë golin e barazimit. Nga ana tjetër,
Vllaznia B mendon për mbrojtjen më shumë, por pa harruar edhe kundërsulmet. Minutat kalojnë dhe loja vjen e bëhet më e egër në fushën e lojës. Ka përplasje të forta sportive nga të dyja ekipet. Lojtarët e Tërbunit nisin të protestojnë për vonesat e lojës,
por edhe ndonjë faull. Katër minuta pa mbaruar takimi për protestë Ujkaj i Tërbunit ndëshkohet me karton të kuq, duke lënë me 10 lojtarë skuadrën e tij. Ndërkaq, Shaba i Tërbunit u dëmtua gjatë një dyluftimi dhe u transportua drejt spitalit.