Kastrioti kërkon trofeun, porta është e blinduar
Krutanët synojnë të mundin Tiranën në ndeshjen finale
Kastrioti ka shijuar javën e pushimit, ndërsa të shtunën e ardhshme do të luajë sfidën e fundit të kampionatit ku do të presë në fushën e vet Egnatian. Një takim që më shumë do të shërbejë si miqësore përpara finales së 16 majit ndaj Tiranës. Kastrioti do të kërkojë ta fitojë titullin e Kategorisë së Parë, gjë që i siguron edhe 30 milionë lekë të vjetër, një bonus jo i pakët për një klub si Kastrioti. Krutanët kanë pësuar vetëm 10 gola këtë sezon, ndërsa në portë kanë pasur një "gardian" të pakalueshëm si Klajdi Kuka. Në një prononcim për gazetën, portieri flet për kampionatin që po mbyllet dhe për objektivat që ka në të ardhmen. "Takimet më të lehta për mua kanë qenë kundër Besëlidhjes dhe këtë e them me bindje të plotë sepse në asnjë nga ato katër takime të zhvilluara kundër tyre, nuk kemi pësuar gol. Është pak e çuditshme për një kundërshtar, i cili kishte objektiva të njëjta me ne. Më vjen mirë, pasi jam në kulmin e karrierës. I jam përkushtuar stërvitjes gjatë të gjithë vitit dhe frytet vijnë avash-avash. Pretendoj që ta arrij këtë gjë edhe në Superiore sezonin e ardhshëm. Objektivi i mbetur sigurisht është ndeshja finale, të shpallemi kampionë, pasi kemi dominuar që nga java e parë", shprehet fillimisht Kuka. I pyetur nëse do të vazhdojë të luajë sërish me fanellën krutane edhe në sezonin në vazhdim, Kuka përgjigjet: "Është ende shumë herët që të flasim për sezonin e ardhshëm, pasi kemi akoma objektiva për të realizuar. Kur të përfundojë plotësisht ky kampionat, do të shohim se çfarë do të ndodhë", përfundoi prononcimin e tij Klajdi Kuka. Liridon Pasha