Juventusi vë duart te titulli
Bufon e dërgoi “Zonjën” në ferr, por Kosta, Khedira e Dibala e rikthejnë në parajsë
Udhëtimi nga ferri në parajsë mund të jetë shumë i shkurtër. Për Juventusin duroi vetëm 20 minuta, koha për të vënë në shinat e duhura një ndeshje si ajo me Bolonjën, e cila kishte nisur keq. Dhe kjo arritje u bë e mundur për "Zonjën e Vjetër" falë Duglas Kostës, i cili me të zbritur në fushë në pjesën e dytë bëri diferencën me dy asiste fantastike dhe të sakta për Khedirën dhe Dibalën. Dhe të mendosh se pikërisht ai Verdi, i cili i kishte thënë jo Napolit në sesionin e merkatos së janarit, kishte rindezur shpresat për titull të të kaltërve. Por, Bolonja pagoi shumë shpejt, që në fillim të pjesës së dytë autogolin e De Maios, përpara se Kosta të niste spektaklin personal. Pas këtij suksesi të radhës, Juventusi ngjitet në +7 pikë nga Napoli dhe e sheh titullin më pranë, ndoshta edhe që sot, nëse Elseid Hysaj me shokë humbin përballë Torinos. AMNEZI E DISAVANTAZH
Pjesa e parë është një rrëmujë e firmosur nga Bufon, i cili gabon një pasim që detyron ndërhyrjen, e gjykuar për penallti, të Ruganit ndaj Krisetig. Nga pika e bardhë, Verdi nuk gabon dhe dërgon në avantazh Bolonjën në minutën e 30-të. Nëse për penalltinë, arbitri Irrati nuk kishte dyshime, ai kërkoi ndihmën e "VAR"-it për të përcaktuar ngjyrën e kartonit për mbrojtësin e Juves dhe zgjedhja ishte e verdha, ndonëse duke qenë rast i pastër për gol mund të jepte edhe të kuqin. Sërish polemika... Në pjesën e parë, ekipi i Alegrit luajti pa dëshirë, sepse në 45 minuta bardhezinjtë krijuan vetëm tre raste modeste për gol, dy me Higuain dhe një me Sandron. DUGLAS SHOU...
Në pjesën e dytë, Alegri kalon nga 3-5-2 në 3-4-3 me Duglas Kostën në fushë dhe menjëherë braziliani merr në dorë ndeshjen, duke qenë ai protagonisti absolut. Me shpejtësinë e tij, ai fut në panik mbrojtjen e Bolonjës, e cila është aq e tensionuar nga krosimet që ai bën, sa edhe kur Kuadrado vendos ta imitojë nga e majta gjen De Maion që në tentativën për ta larguar topin e dërgon me gju në rrjetën e tij. Kishin kaluar vetëm 7 minuta lojë dhe kaq i mjafton Juventusit që jo vetëm të barazojë, por edhe të përmbysë në 20 minutat e ardhshme, duke qenë se në të 63ën Khedira dërgon në rrjetë krosimin nga e majta të Kostës, ndërsa gjashtë minuta më vonë, Dibala godet saktë në rrjetë asistin brenda
zonës së brazilianit. Gjithsesi, përpara avantazhit dhe hipotekimit të fitores, Juventusi kishte rrezikuar sërish të pësonte, por Kraft ishte i pafat, duke qenë se goditi traversën. Në fund, "Zonjë e Vjetër" bën festë dhe sheh titullin kampion shumë pranë.