Gentian Selmani drejt Francës, zbulohet klubi që po negocion

Portieri i Laçit mund të transferohet te Shatoru në Ligën e dytë

Prej tri sezonesh është konfirmuar si një prej portierëve të talentuar të kampionatit shqiptar, duke debutuar në Kategorinë Superiore që 17 vjeç. Pas aventurës me Laçin, duket se ka ardhur momenti që Gentian Selmani të provojë një eksperiencë jashtë Shqipërisë. "Panorama Sport" zbulon ekskluzivisht se portieri i Kombëtares Shpresa është në bisedime të avancuara me klubin e Ligës së Dytë franceze, Shatoru. Mësohet se prej kohësh agjentët e klubit që aktualisht është në vend të nëntë të kampionatit të Ligës II po ndjekin Selmanin. Sipas të gjitha gjasave, transferimi i portierit do të marrë formë në verë, në një kohë që avantazhi i kalimit në Francë është edhe për faktin se federata e këtij vendi, e cilëson shqiptar si lojtar vendës, pra jo ekstrakomunitar. Falë një marrëveshjeje që kanë bërë dy federatat, çdo futbollist me nënshtetësi shqiptare mund të luajë si vendës në Francë. Ndërkohë, për Selmanin ka pasur edhe zëra se mund të ishte pasardhësi i Orges Shehit te Skënderbeu, por fakti që po luan rregullisht edhe me Kombëtaren U-21 ka rënë në sytë e menaxherëve të huaj. Gazeta mëson se shkes për transferimin te klubi francez i 20-vjeçarit po bëhet ish-lojtari i Kombëtares, Edvin Murati. Prej dy dekadash, ky i fundit jeton në Francë dhe njëkohësisht ka një kompani menaxhimi, të cilën e udhëheq bashkë me vëllanë e tij, Sokolin. Uzuni - Laçi është një prej ekipeve me moshën mesatare më të ulët në Kategorinë Superiore. Krahas Selmanit, një paraqitje të jashtëzakonshme këtë sezon ka bërë edhe mesfushori beratas, Myrto Uzuni. Për këtë të fundit klubi kurbinas ka shpenzuar 25 mijë dollarë, duke blerë kartonin nga Apolonia. Tashmë drejtuesit e Laçit do të kërkojnë të shesin beratasin, duke mbushur arkën e klubit.