Telushi kërkon falje, por nuk i shpëton gjobës
Klubi nuk e zbulon shumën, zakonisht shkojnë 2 mijë €
jaftuan 48 orë që të zbutet acarimi i krijuar në stërvitje mes mesfushorit Bruno Telushi dhe trajnerit Klevis Dalipi. Shkak u bë lënia jashtë formacionit në momentin që tekniku përcaktoi njëmbëdhjetëshen për transfertën e Gjirokastrës. Lojtari i kërkoi llogari trajnerit pse nuk është titullar dhe në fund debatuan në distancë dhe i mërzitur la stërvitjen në mes dhe u largua. Masa e parë që morën drejtuesit për këtë veprim të lojtarit ishte mosgrumbullimi me ekipin për Luftëtarin. Por, mësohet se lojtari e ka kuptuar gabimin që bëri dhe ka kërkuar falje për veprimin dhe dje ka nisur përgatitjet me skuadrën nën drejtimin e trajnerit Dalipi. Gjithsesi, mesfushori pritet të përballet me gjobën e klubit për thyerje të disiplinës. "Panorama Sport" u interesua dje pranë klubit për të mësuar situatën e Telushit dhe zëdhënësi për shtyp i Partizanit, Olsi Ranxhi, sqaroi të gjitha veprimet që janë kryer. "Telushi u ka kërkuar falje shokëve të ekipit dhe stafit për atë që ndodhi në seancën e fundit stërvitore para ndeshjes me Luftëtarin. Pas kësaj, lojtari i është bashkuar grupit dhe ka vijuar programin stërvitor. Gjithsesi, ndaj lojtarit klubi do të zbatojë masën disiplinorë, siç e përcakton rregullorja në raste të tilla", u shpreh për "Panorama Sport" zëdhënësi i klubit të kuq, Olsi Ranxhi. Sa i përket shumës, në klub nuk japin detaje, pasi kur flitet për parà, ato konsiderohen konfidenciale. Gjithsesi, gjobat aplikohen sipas shkallës së thyerjes së disiplinës. Por gjobat më të zakonshme të aplikuara nga klubi kanë qenë në shifrat 2 mijë euro. Gjithsesi, drejtuesit ende nuk e kanë miratuar gjobën që t'i vendoset Telushit për debatin me trajnerin në fushën stërvitore.