Idrizi: Liçajn e dua në staf, 80% e ekipit do të ruhet
Edmond Liçaj është një ndër kandidatët kryesorë për trajner të Flamurtarit sezonin e ri. Lajmin e zbuluar nga "Panorama Sport" e konfirmon edhe vetë administratori. Sinan Idrizi tha se fillimisht i ka propozuar Liçajt post drejtues në klub dhe mbetet i hapur për të negociuar më pas për rolin e trajnerit. Ai duket se i ka vënë qëllim vetes që sezonin tjetër t'ua besoj pankinën vlonjatëve. Administratori thekson se për momentin nuk ka çështje "trajneri", pasi ai është Ardi Behari. "Po, është e vërtetë. Unë kam pasur një takim me ishtrajnerin e Flamurtarit, Edmond Liçaj. I kam ofruar që të afrohet te Flamurtari. I kam kërkuar që fillimisht të jetë pjesë e stafit, në një pozicion drejtues dhe së bashku të diskutojmë për vazhdimësinë, duke ndërtuar Flamurtarin e sezonit të ri. Pse jo, Edmond Liçaj është edhe një kandidat për trajner të Flamurtarit. Ai është një personalitet i futbollit tonë. Por deri tani, ne nuk kemi hapur ndonjë tender për trajner, pasi kemi Ardi Beharin. Sezonin e ri dua të kem vlonjatë në stil, si Ruci, Liçaj apo të tjerë", tha Idrizi. RINOVIMET - Flamurtari vijon të mbetet pezull për sa u përket rinovimeve të lojtarëve, por administratori deklaron se: "80 për qind e këtij ekipi do të qëndrojë. Nuk është pritshmëria që ne kishim për disa nga lojtarët e janarit, por nuk mendoj se duhet të themi që dështuam. Jemi të vonuar me rinovimet. Por do të fillojmë së shpejti". Lojtarët kryesorë të Flamurtarit, Alvesh (i larguar për shkak të dëmtimit), Bushiç, Nurkoviç, Bicaj, Siljanovski, Veliu, Musta, Pollozhani, Useini, nuk kanë kontratë për sezonin e ardhshëm, ndërsa ajo u përfundon në fund të këtij sezoni. Kamara, Sidibe, Hoxhaj dhe Tunkara janë të huazuar dhe pritet që edhe me ta të diskutohet, pasi me letra janë pjesë e klubeve të Besëlidhjes, Skënderbeut dhe Lacios. Ndërkaq, lojtarët në kontratë janë ata që u bënë pjesë e Flamurtarit në janar, Igor Nedeljkoviç, Muarem Muarem dhe Fisnik Zuka. MERKATO - Administratori Sinan Idrizi mendon që të mos ndërhyhet shumë në merkato për sezonin e ri. Gjasat janë që të afrohen disa lojtarë nga jashtë vendit, të cilët të bënë diferencën. "Pak ditë më parë takova në Tiranë një menaxher të huaj të njohur. I kërkova që të na sugjerojë për të afruar disa lojtarë cilësorë nga tregu i huaj që të bëjnë diferencën. Jemi në kontakte me të", përfundoi Idrizi. Ermal Sika