Hila: Do bëhem baba, goli për bashkëshorten

Mesfushori tregon sekretin mes gëzimit për skuadrën dhe lajmit të madh që ka marrë

Mesfushori Ardit Hila zhvilloi një ndeshje mjaft të mirë në "Niko Dovana" kundër Kukësit, ku u tregua i saktë nga pika e bardhë e penalltisë dhe shënoi golin e barazimit të përkohshëm. Organizatori e bëri mjaft mirë detyrën e tij duke qenë deciziv së bashku me Hrkaç në qendër të mesfushës, në ndërtimin e manovrës sulmuese, por edhe bllokimin e kundërshtarit. "Jam shumë i kënaqur, pasi morën një fitore shumë të rëndësishme, por edhe për golin. Në këtë ndeshje as barazimi nuk na bënte punë dhe morëm atë që donim falë përkushtimit tonë në fushë. Kënaqësia është e më e madhe kur shikon që Vllaznia barazoi me Kamzën", tha fillimisht elbasanasi për "Panorama Sport". "Gara është shumë e fortë, nuk ka ndonjë diferencë të madhe pikësh. Duhet të marrim më të mirën në ndeshjet e mbetura. Nuk mund të them e lehtë, pasi vuajtëm shumë në fushë. Djemtë ishin të karikar që pas ndeshjes me Partizanin, luanim në shtëpi dhe ishim të bindur se do të fitonim. Futbolli i pranon të gjitha, e rëndësishme është që ekipi reagon pas golit dhe ka besim. Diçka që e kemi treguar si me Partizanin ashtu edhe me Kukësin. Në tërësi kemi bërë një ndeshje shumë të mirë, pavarësisht gabimit në golin e parë", ka thënë Hila. DEDIKIMI - Por, ky gol ka qenë edhe me dedikim për futbollistin e Teutës, që ka zbuluar edhe një sekret të bukur në jetën e tij, pasi do të bëhet baba. "Ishte një gol i rëndësishëm që dua t'ia dedikoj bashkëshortes sime pas lajmit që më dha këtë javë se do të bëhem baba. Jam shumë i lumtur dhe dua të falënderoj Zotin për gjithçka", ka mbyllur Hila deklaratën e tij. Tashmë futbollisti, ashtu si gjithë pjesa tjetër e skuadrës, duhet të jetë i përqendruar për ndeshjet e radhës, pasi objektivi për të mbijetuar në Kategorinë Superiore ende nuk është realizuar dhe durrsakët janë të rrezikuar. Drilon Xhepollari