Guri në ankand, Gjici do milionat

Sindrit Guri me golat e shënuar është kthyer në "yllin" e Superiores. Shkodrani i Kukësit ka shënuar 19 herë në 31 takime. Gjysmën e dytë të këtij sezoni, 24-vjeçari ka shpërthyer duke shënuar plot 15 gola në 15 takime, një ecuri e jashtëzakonshme, e cila ka rënë në sy të shumë menaxherëve nga Europa dhe jo vetëm. Në adresë të Kukësit për të transferuar Gurin kanë ardhur me dhjetëra oferta. Klauzola e shitjes së Gurit është 1 milion euro, shumë e cila do jetë e vështirë për t'u ofruar, por jo e pamundur, pasi me ecurinë që lojtari po bën, po rrit shumë vlerën e tij në treg. Guri ka përcaktuar si destinacion kampionatin belg dhe janë disa klube nga ky vend që kanë ofruar deri në 700 mijë euro për të marrë shërbimet e sulmuesit, ku Gent dhe St. Truiden janë më të njohurat. Por në listën e klubeve janë shtuar Klub Bruzh e Standardi Liezhit. Në mes ka hyrë dhe menaxheri që ka transferuar Abazajn tek Anderleht, Shkumbin Qorrmemeti, i cili ka dal garant për cilësitë e Gurit. Por është pikërisht presidenti Gjici që ka ngulur këmbë se ofertat e deritanishme nuk kanë përmbushur pritshmëritë e tij. Por, gazeta mëson se për Gurin është hapur një ankand i vërtetë sepse shumë klube janë të interesuara seriozisht për të, ku oferta kanë ardhur nga Beshiktash në Turqi, Saint Etien në Francë, Rapid i Vjenës, etj. Tashmë te Kukësi janë të vendosur se kush ekip do japë atë çka Kukësi dhe vetë lojtari kërkojnë, atje lojtari do transferohet dhe pse më afër duket një prej klubeve belge. PËRFAQËSUESJA - Përveç menaxherëve të huaj, interesi për Gurin tregoi edhe trajneri i Kombëtares, Kristian Panuçi, i cili e ndoqi lojtarin në ndeshjen e fundit që skuadra luajti ndaj Teutës. Me shumë gjasa, shënuesi më i mirë i Superiores do marrë një ftesë për t'u grumbulluar në përfaqësuese. Largimi i futbollistit për një shifër rekord nga skuadra e Kukësit pritet të bëhet shumë shpejt realitet.