Nga Katari në Romë, Xhixho donte një natë "speciale"
Paraqitja më e dobët në një natë speciale. Ky përkufizim mund ta përshkruajë më së miri ndeshjen e Xhanluixhi Donarumës ndaj Juventusit. Mbase Xhixho ëndërronte një natë si ajo e Dohas (Katar), ku edhe falë tij Milani fitoi Superkupën e Italisë, pikërisht ndaj bardhezinjve. Gjendja e rënde e portierit kuqezi dallohej qartë, edhe pse nga ekrani i televizorit. Xhixhi, portieri i Juves, u mundua të ngushëllojë, por as kapiteni i Zonjës, e aq më pak mbrojtja publike e Gatuzos, nuk ndikuan në moralin e djaloshit që, teksa dilte nga fusha, dukej një shpirt i humbur. Zhgënjim- Donaruma përjetoi një nga ato mbrëmje që duhen harruar sa më shpejt. As bashkëvuajtësit si Bonuçi apo Storari nuk arritën të gjenin fjalët për ta ngushëlluar. Dy gabime trashanikë nga ana e tij i kushtuan shumë Milanit, por Juventusi i pjesës së dytë ishte një mal shumë i lartë për t'u kapërcyer, edhe pa gabimet e numrit 99 kuqezi. Benatia dhe Duglas Kosta i treguan se vëmendja nuk duhet ulur kurrë, edhe kur goditjet duken të administrueshme. Milani mori katër shuplaka, teksa Gatuzo shpreson që Xhixho të ketë marrë një mësim të vyer, pasi siç thotë trajneri i "Djallit", "përvoja nuk blihet", ndaj 6 milionë eurot e rrogës së Xhixho, në këtë aspekt vlejnë vërtet pak.
Finalja e fundit? - Shumëkush, te Milani, mbrëmjen e 9 majit priste diçka tjetër, mbase pozitive. Ndër ta ishte edhe Xhixho, që në "premierat" e tij kundër Juventusit kishte treguar aftësi të mëdha. Këtu nuk hyn vetëm ndeshja në Superkupë (trofeu i parë i Donarumës), por edhe pritja ndaj Khedirës në tetorin e 2016-s, kur 19 vjeçari kuqezi shpëtonte rezultatin më një fluturim spektakolar. Këto paraqitje janë në mendjen e gjithkujt, ashtu siç mund të jetë fakti që ndoshta ajo e së mërkurës ka qenë finalja e fundit e Donarumës me fanellën e Milanit. Disa nga klubet më të mëdha europiane duan talentin e portës së kuqezinjve dhe nuk do të jetë një ndeshje që do të ndikojë në opinionin për të, pavarësisht se Xhixho dhe Raiola do të kishin preferuar një ndeshje të madhe, në një natë speciale.