KOKSH-i jashtë, gafa e Ministrisë me Këshillin e Lartë të Sporteve
Ombrella e të gjitha sporteve nuk përfshihet në strukturën e re
Këshilli Kombëtar i Sportit, duke qenë një organ këshillues, tashmë do të funksionojë në bazë të një ligji, me kompetenca të plota, duke marrë pjesë në hartimin dhe zhvillimin e politikave të shtetit për sportin, që do të funksionojë pranë ministrisë përgjegjëse për Sportet, që aktualisht është MASR. Në mbledhjen e radhës së Këshillit të Ministrave, midis 13 vendimeve të ditës së djeshme ishte dhe vendimi për krijimin e Këshillit të Lartë të Sporteve, ku tekstualisht thuhet: Këshilli i Ministrave të Republikës së Shqipërisë ka marrë vendimin për "Përcaktimin e përbërjes strukturore e të shpërblimit të anëtarëve të Këshillit të Lartë të Sportit". Kjo është bërë në mbështetje të nenit 100 të Kushtetutës dhe të nenit 9, 19 të ligjit nr.79/ 2017, "Për Sportin", me propozimin e ministrit të Arsimit, Sportit dhe Rinisë. GAFA ME KOKSH- in - Harresë apo e qëllimshme... Sipas këtij vendimi, në ndërtimin strukturor të këtij Këshilli të Lartë Sportiv, që do të drejtohet nga përfaqësuesi i MASR, do të jenë në përbërje 12 anëtarë dhe një sekretar. Të bie në sy fakti, ose ndoshta mund
të jetë një gafë, që mund të quhet ajo e Ministrisë së Sporteve, lënia jashtë strukturës së KLSsë, ajo e KOKSH- it. Pasi prezentë me anëtarë parashikohen vetëm tri federata sportive, ajo e Futbollit, Basketbollit dhe Volejbollit. Të çudit fakti i lënies jashtë kësaj strukture përfaqësimi
i KOKSH-it me një anëtar, që është edhe ombrella e të gjitha sporteve në Shqipëri. Anëtarë të tjerë të këtij Këshilli do të jenë nga IKSHS (Instituti Kërkimor Shkencor e Sportiv), dy përfaqësues nga biznesi, tre personalitete sportive, një jurist dhe një gazetar sportiv.