Spaleti: Interi nuk fal, me Sasuolon mjafton edhe 1-0
Nga ekipi te merkato: Jemi përmirësuar, për De Vrij s’flas...
Rreziku qëndron, është i qartë: duhet menduar nëse ia vlen të mendosh për përballjen direkte të 20 majit duke nënvlerësuar Sasuolon, që ka siguruar qëndrimin në Serinë A, por jo për këtë arsye do udhëtojë në Milano për "ekskursion" kundër një Interi të uritur për Champions. "Për të fituar ndeshjen e nesërme (sotme) duhet të luajmë në mënyrën e duhur. I vetmi për t'u vlerësuar është Miranda, por përjashtimi në Udine ishte ndoshta maksimumi që mund të bëja. Do vlerësoj me qetësi, ndërsa për Galjardinin do mendojmë javën që vjen. Por, skuadra këto ditë është stërvitur në mënyrën e duhur dhe do kemi shtysën e përhershme të publikut. Nëse jemi në këtë pikë është edhe meritë e tifozëve", ka komentuar për "Inter TV" Luçiano Spaleti, përpara se t'i drejtohej sallës së konferencës për shtyp.
GJYSMËFINALE - "Vërtet, flitet për Lacion, merkaton, pagesa e të tjera, - ka vijuar trajneri, - por te lojtarët e mi shoh përqendrimin e duhur. Kundër Sasuolos luajmë një gjysmëfinale që duhet ta fitojmë, për të luajtur gjithçka në 'finale' kundër Lacios. Po të isha Inzagi, a do e aktivizoja De Vrijn? Duhet të mendoj për çështjet e skuadrës sime, nuk jam superhero që mendoj për të tjerët". A është e drejtë të vlerësohet sezoni në bazë të renditjes (apo jo) në vendin e katërt? Spaleti e ka përgatitur përgjigjen: "Ua lë juve gjykimin, mund të them vetëm se krahasuar me javën e parafundit të sezonit të kaluar jemi -4 pikë nga Roma dhe ishin - 16, - 2 nga Lacio dhe ishim -9. E kështu me radhë, nga Milani tek Atalanta. Në fund gjykoni ju, nëse jemi përmirësuar ne apo janë përkeqësuar të tjerat... Ne jemi një skuadër e fortë, kaluam një periudhë të vështirë, nga e cila arritëm të dalim. Nuk mendoj se për kthesën ndihmuan vetëm Kanselo e Rafinja, në skuadër kemi shumë resurse". Ikardi është gati të luajë në dyshe me një tjetër sulmues? "Nuk ka asnjë ndalesë, por tani nuk mund të mendojmë për sezonin e ardhshëm. Rëndësi ka vetëm Sasuolo".
RESPEKT - "Mua më intereson vetëm të fitoj ndeshje, kush mendon për goleadat nuk ka luajtur kurrë futboll, - ka komentuar Spaleti, - edhe pse kështu s'tregohet respekt për kundërshtarin. Unë dua të fitoj 1-0! Dhe mund t'i jap njëfarë note sezonit. Një notë kaluese të plotë: 6,5. Edhe pse është e qartë që më pas duhet të rregullojmë diçka, e madje duke mos përsëritur gabimet e verës së kaluar. Megjithatë, unë qëndroj i qetë, sepse në fillim të sezonit mendoja se do ishin tri skuadrat që do renditeshin
larg nesh. Në gusht do kisha firmosur për t'u gjetur 180' nga fundi me fatin në dorën tonë". Dyshimi VesinoBorha: "Kanë karakteristika të ndryshme, me Borhan ecën mirë kur ke kontrollin e lojës, Vesino të jep pak nga të gjitha. Çelësi, gjithmonë, mbetet fitimi
i topit". Lider? "Shkrinjar, që prej korrikut, ka treguar se i ka dhuntitë, duke nisur që nga entuziazmi i shfaqur për të ardhur këtu. Dhe është konfirmuar çdo ditë, duke nisur nga stërvitja: nuk vjen vetëm për t'u shfaqur. Mund të luajë në çdo skuadër të botës". Pesë
lojtarët që rrezikojnë prej kartonëve? "Duhet të fitojmë, ndaj luajnë më të mirët".
BOBAN - Një kuriozitet në fund. Në mëngjes, në qendrën stërvitore "Appiano Gentile", është shfaqur Zvonimir Boban. "Si drejtues i FIFA-s, - shpjegon Spaleti, - kaloi për të na propozuar formatin e ri për Botërorin e klubeve që duhet të lindë nga qershori i 2021-ës, me edicione çdo katër vite".