Vllaznia e nis me analizë, tre lojtarë kanë probleme

Në pasditen e së premtes, Vllaznia ka nisur përgatitjet për ndeshjen e radhës me Partizanin. Përpara fillimit të kësaj seance, është zhvilluar një analizë e shkurtër me ekipin, teksa para futbollistëve ka folur fillimisht trajneri Gjoka dhe më pas administratori Gjyrezi. Të dy nuk kanë dashur t'i kushtojnë shumë rëndësi asaj çfarë ka kaluar dhe situatës së krijuar pas barazimit me Kamzën, por kanë kërkuar nga lojtarët angazhim maksimal për pjesën e mbetur të kampionatit. Edhe pse në pamje të parë gjithçka duket shumë e vështirë, edhe në radhët e futbollistëve është vërejtur një besim se mund t'ia dalin. Gjyrezi dhe Gjoka u kanë kërkuar futbollistëve të fokusohen maksimalisht për ndeshjen me Partizanin dhe të mos mendojnë për më tej, por vetëm te kjo sfidë në të cilën patjetër që duhet synuar fitorja.

PROBLEMET - Pas përfundimit të minianalizës, trajneri ka nisur edhe seancën e parë stërvitore. Në këtë seancë Gjoka nuk ka pasur të gatshëm dy lojtarë. Bëhet fjalë për mbrojtësin Renato Malota dhe mesfushorin Florind Bardulla, të cilët kanë pasur shqetësime pas takimit me Kamzën. Nga ana tjetër, edhe kapiteni Lika ka zhvilluar dje stërvitje të diferencuar. Për të tre futbollistët shpresohet se do të jenë të gatshëm për përballjen e së dielës. Ajo që ngroh teknikun është rikthimi i Nuredin Orelesit, një tjetër lojtar me vlera për kuqeblutë. Ndërsa ajo që mund të quhet pozitive është se para këtij takimi Vllaznia nuk do të ketë asnjë mungesë për arsye kartonësh. Trajneri Gjoka do të ketë luksin e përzgjedhjes, teksa gjasat janë që ndaj Partizanit të ketë një formacion ndryshe nga ai kundër Kamzës. Admir Uruçi