Kamza humb Zguron dhe hap dyert për tifozët

I majtë është i pezulluar prej të verdhëve, lojtarët videomesazh motivues

Kamza vazhdon me mungesat. Në një tjetër "finale" duhet të bëjë llogaritë pa një lojtar të rëndësishëm. Këtë herë bëhet fjalë për mbrojtësin e linjës së majtë, Vangjel Zguron, i cili ka plotësuar numrin 4 të kartonëve të verdhë. Veç tij, pezull mbetet edhe Stevan Raçiç, i cili edhe dje ka vijuar të stërvitet i veçuar nga grupi. Edhe pse nuk është konfirmuar ende se çfarë ka ndodhur me serbin, duket se debati që pati me trajnerin në prag të ndeshjes është motivi i lënies jashtë të sulmuesit. Lajmi i mirë është që do të kthehet Masato Fukui, që ka ezauruar skualifikimin. Sido që të jetë, kamzalinjtë e drejtuar prej Julian Ahmataj janë gati për të kaluar me sukses një tjetër "betejë" që do shpëtonte këtë sezon. Sikur të mos mjaftonin premiot, të gjithë janë mobilizuar për t'i krijuar kushtet e nevojshme ekipit për të shpëtuar sezonin. Drejtuesit kanë menduar që të hapin edhe dyert e stadiumit dhe këtë gjë e njoftuan dje në faqen zyrtare, ku shkruanin: "Të dielën të gjithë në stadium! Hyrja falas. Kërkohet mbështetja juaj për gladiatorët tanë. Forca Kamza!". Megjithatë, ky ishte vetëm fillimi, pasi më vonë postuan edhe një video inkurajuese. Me zërin e titullarëve më të rëndësishëm të ekipit, konkretisht Idrizajt, Frashërit, Memetit dhe Plakut, ata i kërkonin lojtarit të 12-të që të bëhen "arma" më e madhe për të siguruar mbijetesën në Kategorinë Superiore. Klubi kamzali kishte realizuar një videomesazh emocionues, ku 4 lojtarët u bëjnë apel sportdashësve që të tejmbushin stadiumin në këtë moment vendimtar. Kur kanë mbetur edhe 270 minuta nga fundi, tashmë çdo takim bëhet përcaktues për të fatet e Kamzës. Nesër do të presin Flamurtarin në shtëpi dhe kjo është vetëm një nga tre "finalet". Sakaq, skuadra ka vijuar përgatitjet intensive edhe dje. Si gjithnjë lojtarët kanë pasur mbështetjen e drejtuesve më të lartë, të cilët gjatë gjithë kësaj periudhe u kanë ofruar përkrahje pa kushte grupit dhe stafit teknik.