Dëmtime dhe mungesa, Pakult kërkon kthesën e Kukësit
Mjafton një pikë për të siguruar vendin e dytë
Kukësi do të presë nesër në shtëpi Luftëtarin, në një ndeshje ku objektivi i vetëm për verilindorët është fitorja. Por edhe barazimi në një ndeshje të tillë mund të jetë i pranueshëm, duke qenë se sigurohet matematikisht vendi i dytë në kampionat dhe në rast të dënimit përfundimtar të Skënderbeut, atëherë skuadra e Pakultit do të marrë pjesë në Champions Ligë. Me një mendim të tillë po ecin në kampin verilindor, madje po planifikojnë dhe skuadrën e së ardhmes. Paçka projektit të madh që Kukësi mendon, drejtuesit nuk e kanë përtypur humbjen në Durrës dhe kanë kritikuar disa prej lojtarëve titullarë për formën dhe ndeshjen jo të mirë që zhvilluan ndaj Teutës. Presidenti Gjici, por dhe vartësit e tij, nuk janë të kënaqur me një pjesë të mirë të futbollistëve dhe me mbylljen e sezonit të paktën 5-6 prej tyre do të jenë me valixhe në duar. Megjithatë, trajneri austriak ka kërkuar që disa prej lojtarëve të harrojnë takimin e shkuar dhe të përqendrohen te sfida e radhës në kampionat. Kjo përballje pritet të jetë e luftuar dhe e hapur duke parë përbërjen e dy skuadrave, ndaj Kukësi do të kërkojë revanshin, pasi në dy takimet e fundit me gjirokastritët janë mposhtur.
Mungesat - Trajneri Peter Pakult është bërë me dhimbje koke sa i përket organikës. Infermieria e Kukësit është plot, pasi janë tre titullarë që janë të dëmtuar, ku dy prej tyre Albi Alla dhe Stivi Frashëri kanë humbur sezonin, ndërsa Kale nuk është i gatshëm. 25-vjeçari pati pësuar një tërheqje muskulore, e cila erdhi e papritur për mjekët e klubit, për vetë futbollistin dhe drejtuesit. Nga ky dëmtim jo i lehtë pogradecarit do i duhen të paktën 4 javë që të rikuperohet. Dëmtim të rëndë në dorë pësoi dhe gardiani Stivi Frashëri, i cili ka thyer bazën e gishtit të madh në dorën e majtë mbas një përplasjeje në rastin e golit të tretë të Teutës. Frashërit do i duhet të qëndrojë dhe të paktën 4 javë jashtë fushave, me qëllim që të rikuperohet plotësisht. Kale është mungesa tjetër e rëndësishme në radhët e ekipit të drejtuar nga Pakult, i cili ka pësuar një dëmtim në sup dhe krah që në takimin e fituar ndaj Skënderbeut në Korçë. Braziliani ka munguar dhe dje në stërvitje. Probleme ka pasur dhe për Dzaria, por mesfushori ia ka dalë për të qenë gati ndaj Luftëtarit. S.Sulozeqi