Juve, konfirmohet blloku fitues
Dibala & CO gati për "Zonjën e re", Khedira e Manxukiç mund të largohen pas dy javësh
Ciklet fituese nuk vazh dojnë përgjithmonë e, aq më pak, karriera e një futbollisti. Juventusin e pret një verë e nxehtë në merkato, ku edhe largimet do të prekin thuajse 30 për qind të organikës nën urdhrat e Maks Alegrit. Një shkrim i "Tuttosport" shpjegon në përqindje, mundësitë e secilit prej lojtarëve të Juves për të qëndruar në Torino.
ZERO SHANSE- Lishtajner dhe Azamoah kanë konfirmuar mbylljen e aventurës bardhezi, teksa heshtja e Bufon është më shurdhuese se kurrë. Kapiteni duket se do t'i thotë "lamtumirë" Juves me Kupën e Italisë, pavarësisht se ëndrra quhej "Champions". Mundësia për ndryshim ideje është e paktët, me 40vjeçarin që duket se nuk do të mbrojë më portën e "Zonjës" e aq më pak të një ekipi tjetër.
LARGIMET- Sami Khedira dhe Mario Manxukiç përfliten se do të kërkojnë vijimin e karrierës gjetiu, ndërsa për Aleks Sandron do të dëgjohen ofertat që duket se do të mungojnë. Asnjëri nga tre të sipërpërmendurit nuk ka më shumë se 30 për qind mundësi për të qëndruar në Torino. Për Benedikt Hëvedes, mbase, nuk do të vlejë impenjimi i shfaqur shumicën e kohës në stërvitje, me gjermanin që ka qenë thuajse për 9 muaj i persekutuar nga dëmtimet. Mbrojtësi i ardhur nga Shalke mund të ndryshojë ambient, pasi dukshëm ai i Torinos nuk i ka bërë mirë. Edhe një gregar si Sturaro përflitet se kërkon të ndryshojë ambient, teksa Dibala mund t'i nënshtrohet diktatit të merkatos, me "kokën" e tij që tashmë vlen më shumë se 150 milionë €. Markizio ndjek ende ëndrrën
amerikane dhe ndoshta Kupa e ngritur bashkërisht me Bufon nuk ka shërbyer për t'i ndryshuar mendim me mesfushorin që ka 50 për qind shanse të qëndrojë.
GRUPI- Të afruar një vit më parë, por edhe për arsye perspektive, konfirmohen qëndrimet
e Bernardeskit, De Shiljos, Duglas Kostës dhe Sheznit që më në fund do të jetë titullar. Rugani mund të konfirmohet duke parë se Barxalji dhe Kielini, të sigurt për qëndrimin, nuk janë një garanci në aspektin e moshës. Bentankur dhe Benatia do të konfirmohen, ashtu si
edhe Pjaniç, për të cilën do të refuzohet çdo ofertë. Matuidi nuk preket e gjithashtu edhe Kuadrado që më në fund gëzon besimin e të gjithë ambientit bardhezi. Sulmi do t'i besohet Higuainit, pavarësisht se rendimenti i sivjetshëm nuk ka qenë ai i sezoneve të kaluara.