Progni i diferencuar, mungon Alban Hoxha
Partizani ka vazhduar dje normalisht përgatitjet për ndeshjen e radhës, që do të luajë ndaj Flamurtarit në transfertë. Sulmuesi Gerhard Progni u është rikthyer përgatitjeve, por ka qenë i diferencuar për shkak se vazhdon të ndiejë ende dhimbje. Ai mungoi në stërvitjen e ditës së martë, që ishte e para për këtë javë. Megjithatë, Progni do të jetë në fushë në takimin që do të luhet të shtunën në Vlorë. Ndërkohë që ka rënë në sy për të dytën ditë rresht mungesa e portierit Alban Hoxha, i cili vazhdon të jetë me leje nga ana e klubit. Pjesa tjetër e skuadrës nuk ka probleme dhe trajneri Dalipi do të hedhë në fushë ata futbollistë që kanë gjendje fizike më optimale. Stërvitja e djeshme ka pasur karakter fiziko-taktik dhe Dalipi ka nisur të mendojë edhe për formacionin. Nuk ka munguar harmonia dhe në Vlorë të kuqtë do të garojnë për të siguruar fitoren, pasi pjesëmarrja në Europë ende nuk është siguruar. Në këtë transfertë, që do të jetë e fundit për këtë sezon, Partizani pritet të ketë edhe mbështetjen e tifozëve.