PAS Janina “fiksohet” me Micin
E duan edhe ekipe franceze, mbrojtësi: Di që ka interesim vetëm nga klubi helen
PAS Janina pëlqen mbrojtësin fierak të Skënderbeut, Gledi Mici. Sigurisht që kampionati i mbyllur nga mbrojtësi bardhekuq ka qenë një nga më të suksesshmit për të, që ka tërhequr vëmendjen e klubeve të ndryshme të huaja. Burime të sigurta të "Panorama Sport" mësuan se PAS Janina në Greqi është interesuar direkt për shërbimet e mbrojtësit të majtë të kampionëve të rinj të vendit. Mësohet se "shkesin" në këtë histori e ka bërë pikërisht mbrojtësi i kombëtares, Andi Lila, i cili u ka dhënë sugjerimet e veta drejtuesve të klubit grek për Micin, si një nga lojtarët e linjës së majtë më të spikaturit në vend. Nga po të njëjtat burime bëhet me dije se ende nuk ka nisur një negociatë zyrtare, por janë njoftuar palët për një interesim dhe mundësi për t'u ulur të bisedojnë në të ardhmen kur të mbarojë sezoni. Por nuk është vetëm PAS Janina ekipi që interesohet për shërbimet e fierakut të Skënderbeut. Falë paraqitjeve të mira këtë sezon, jo vetëm në kampionat për mbi të gjitha në Europa Ligë, klube nga Liga e Dytë franceze kanë kërkuar që të marrin informacion për futbollistin. Kjo është diçka pozitive në këtë pikë, pasi bëhet fjalë për një kampionat në një nga shtetet elitare të
Europës, ku Mici mund të krijonte aventurën e vet. Përveç kësaj, avantazhi tjetër i madh është fakti se, falë një bashkëpunimi mes dy federatave të dy vendeve, lojtarët shqiptarë nuk konsiderohen si ekstrakomunitarë në Francë dhe mund të luajnë pa
shumë probleme edhe në një klub që ka të madh numrin e të huajve. Kjo do të ishte një avantazh i madh për mbrojtësin e Skënderbeut. KONFIRMIMI
Nga ana tjetër, për të konfirmuar një situatë të tillë, gazeta ka marrë edhe prononcimin
e mbrojtësit të Skënderbeut, i cili në njëfarë mënyre ka qenë në dijeni të interesimit të PAS Janinës, pavarësisht se sipas tij nuk ka asgjë zyrtare. "Të them të drejtën, e di që ka një interesim nga PAS Janina, por nuk ka mbërritur ende ofertë zyrtare.
Normalisht, kur vijnë oferta, sigurisht që është kënaqësi, pasi do të thotë se ke bërë mirë në pjesën më të madhe të sezonit. Ndërsa për këtë ekipin francez nuk kam ndonjë informacion të momentit, - theksoi fillimisht Mici për të vijuar më pas. -
Unë tashmë jam i fokusuar vetëm te Skënderbeu, pasi kemi bërë një sezon të shkëlqyer dhe jemi shpallur kampionë. Kemi edhe finalen e Kupës për të luajtur dhe të shpresojmë që gjithçka do të shkojë mirë edhe në Europë, ku në bazë të asaj çka na ka thënë klubi, do të jemi në Champions për të treguar edhe një herë forcën tonë. Nga ana tjetër, për sa i përket së ardhmes, sigurisht që do të më pëlqente një aventurë jashtë vendit në ndonjë kampionat të nivelit superior ndaj këtij që luajmë, por nëse do të jetë diçka e ngjashme, atëherë zgjedhja ime e parë është pa dyshim Skënderbeu", përfundoi Mici. Mbrojtësit të majtë të Skënderbeut i përfundon kontrata pas një sezoni, pasi nënshkroi për tri vite në momentin e afrimit të tij në Korçë.