Grizman i dhuron kupën Atletikos
Sulmuesi francez godet dy herë transalpinët, kapiteni Gabi mbylli llogaritë me finalen
N ë Ligën e Europës është një tjetër histori... Në Ligën e Europës nuk janë "kushërinjtë" e veshur me të bardhë që çdoherë i patën shuar ëndrrat në momentin më të bukur. Në Ligën e Europës Realin e bën Atletiko e Madridit... Trofeu i tretë në 9 vite, kupa e dytë për "Çolo" Diego Simeonen, pas asaj në vitin 2012. Pritje e Marsejës, që trofeun e fundit europian e ka fituar në vitin 1993 duhet të vazhdojë... Dopieta e Grizmanit, që në 2016- ën humbi dy finale në një muaj thyen shpejt rezistencën e francezëve, ndërsa kapiteni Gabi vë firmën te 3-0, "piktura" këto të një grupi që nga viti 2012 e në vazhdim ka luajtur gjithmonë një rol prej protagonisti në futbollin europian. Ndeshja nuk ishte aspak e luftuar deri në minutën e fundit. Fundja, edhe parashikimi i pragsfidës ishte me sens unik. Në fund, fiton "çolizmi"... GRIZMAN ZHBLLOKON...
Zjarri që tifozët e frikshëm të Marsejës i vunë tribunës së tyre në momentin e prezantimit të skuadrave, disa flakadanë në fushë dhe mjegulla që ata krijuan në stadiumin e Lionit, trembi disi në fillim Atletikon e Madridit, duke qenë se të zotët e shtëpisë e shohin golin shumë pranë, por asisti fantastik i Paje për Zhermen, i vetëm përballë portierit dërgohet mbi traversë. Një rast flagrant i humbur nga të zotët e shtëpisë, i cili nuk bën gjë tjetër, veçse zgjoi gjigantin e fjetur, atë Antuan Grizman që do të fitojë i vetëm ndeshjen. Atletiko, si gjithmonë shumë e kujdesshme pret iniciativën e kundërshtarit, por kur nis të fitojë metra dhe sidomos kur lëshohet në kundërsulm është thjesht vdekjeprurëse. Golin e gabuar shumë shpejt, Marseja e paguan shtrenjtë, sepse ylli i madrilenëve në aksionin e parë të vërtetë e dërgon topin në rrjetë: Anguisa gabon stopimin e topit të ardhur nga portieri Mandanda, Gabi rikuperon dhe nis menjëherë Grizmanin, i cili me të hyrë në zonë nuk fal me të majtën. 1-0 për Atletikon dhe ndeshja vihet në dishezë për spanjollët, ndonëse Marseja tenton menjëherë të reagojë me një goditje me kokë të Okampos, por që përfundon jashtë për çështje centimetrash. Dhe për ta bërë më të errët mbrëmjen e francezëve është
dëmtimi i yllit të skuadrës, Dimitri Paje, i cili në minutën e 33-të lë fushën mes lotëve për një tërheqje muskulore dhe Atletikos kaq i mjafton që ta ndiejë më shumë mes duarve trofeun. Pjesa e parë mbyllet me skuadrën e Garsias në sulm, por një herë
Oblak dhe herë të tjera mbrojtja madrilene largojnë rrezikun. GRIZMAN E MBYLL...
Pjesa e dytë, ose më saktë, e gjithë ndeshja mbyllet pa filluar mirë për Marsejën sepse pas vetëm 4 minutash lojë, transalpinët kapitullojnë: Koke gjen vertikalizimin
perfekt në thellësi për Grizmanin, me francezin që e shtyn topin përpara dhe me të majtën djeg në dalje Mandandanë. 2-0 për Atletikon, Marseja hyn në konfuzion total dhe pasi rrezikon autogolin me Rami, i dorëzohet pa kushte spanjollëve. Skuadra e drejtuar nga Burgos (Simeone në tribunë, pasi ishte i skualifikuar) merr frenat e lojës në dorë, ndërsa nga ana tjetër, trajneri Garsia edhe pse mundohet të ndryshojë ritmin, duke hedhur në fushë N'Jie e Mitroglu, është e vështirë që të çajë Atletikon. Me avantazhin e dyfishtë, madrilenët nuk kanë nevojë që të shpenzojnë energji, por rigrupohen në mesfushën e tyre dhe presin. Francezët shtyjnë, tentojnë të bëjnë gjithçka për të rihapur sfidën, por kur shohin që rasti i tyre më i artë, ndalet në shtyllën e goditur nga Mitroglu, në minutën e 81-të, atëherë shpresat shuhen përfundimisht dhe të gjithë presin goditjen finale. Pikërisht atë goditje që ia jep Gabi, në të 88-ën që stopon asistin e dytë nga Koke në brendësi të zonës dhe me të djathtën nga pozicion diagonal dënon sërish portierin Mandanda. Atletiko bën tris, ndërsa Grizmani në minutën e 90-të del nga fusha e lojës si hero, si njeriu i finales dhe merr duartrokitjet edhe nga tifozët kundërshtarë, të cilët me Botërorin në horizont shpreson që t'i bëjë të ëndërrojnë me bluzën e Francës.