Nga Ibra te Hart dhe Lamela, yjet e përjashtuar
Tani është zyrtare: në Botërorin e ardhshëm, Zlatan Ibrahimoviç nuk do të jetë dhe konfirmimi vjen nga lista e 23 lojtarëve të grumbulluar nga kombëtarja suedeze, ku emri i sulmuesit të Los Anxheles Galaksisë nuk duket askund. Dhe kështu fiton trajner Jane Anderson, i cili muajin e shkuar e kishte thënë qartazi se veterani nuk do të thërritej në Rusi, duke qenë se ishte larguar vullnetarisht nga kombëtarja pas zhgënjimit në Euro 2016. Një vendim që i pëlqeu federatës nordike, por edhe shumë tifozëve, por që e përtypi me vështirësi sulmuesi, i cili kishte lënë të kuptohet në më shumë se një rast se po e merrte në konsideratë idenë e rikthimit me fanellën e Suedisë, duke shtuar se "një Botëror pa të, nuk do të ishte një Botëror".
MUNGESAT E TJERA- Më pak të zhurmshme krasitjet e Garet Sauthgejtit tek Anglia: Xhek Uilsher, Rajan Bertrand, Kris Smolling, Adam Lalana dhe mbi të gjitha Xho Hart, u lanë jashtë "Tre Luanëve". Portieri është tërbuar me trajnerin e Uest Hemit, Dejvid Mojes (u largua dje nga klubi), të cilin e bën fajtor për lënien në stol në tre ndeshjet e fundit të sezonit, diçka që mund të ketë qenë faktor në mungesën e ftesës për ish-numrin 1. Por, edhe në listën e Gjermanisë dhe Argjentinës ka shkurtime luksi si ato të trajnerit Lëv, i cili vendosi të lërë në shtëpi heroin e finales kundër Argjentinës në Brazil 2014, Mario Gëcen dhe Emre Xhanin, duke thërritur kapitenin Manuel Nojer edhe pse humbi pjesën më të madhe të sezonit për shkak të dëmtimit. Ndërsa, Sampaoli ka zgjedhur të eliminojë emrin e Erik Lamelës nga lista, edhe për shkak të 29 ndeshjeve në total të mesfushorit argjentinas me Totenhemin gjatë sezonit.