Laçi fiton në limite, Kamza dorëzohet totalisht
Kryeqytetasit i afrohen fundit, mbijetesa në rrezik
Kamza nuk ia del në shtëpi, në një ndeshje dramatike përballë Laçit, duke rihyrë kështu në vorbullën e rënies nga Kategoria Superiore, e cila duket më pranë se asnjëherë më parë. Kamzalinjtë u ndëshkuan që në minutën e parë, por barazuan pesë minuta nga fundi, çka krijoi idenë se të besuarit e trajnerit Ahmataj siguruan pikën e nevojshme për të qëndruar edhe një vit në mbijetesë. Por, në mënyrë të pakuptimtë dhe në një aksion pa shumë pretendime në fundin e kohës së rregullt, kurbinasit shënojnë edhe golin e fitores, pas një hutimi të mbrojtjes vendëse. Laçi me këtë rezultat pothuajse ka siguruar vendin e katërt, pasi ndeshjen e radhës do të luajë në shtëpi ndaj Teutës. Ndërsa Kamza do të ketë një transfertë ndaj Partizanit.
PJESA E PARË - Një aksion, një gol. As vetë kurbinasit ndoshta nuk e kishin menduar një nisje të tillë, por për t'i dhënë qetësi Laçit në atë që konsiderohej si transferta më e vështirë ndaj Kamzës. Një top për Rexhinaldon në hyrje të zonës kthehet në një asist për futbollistin, që fluturimthi nuk mendohet dy herë, por gjuan një top që, pasi përplaset në tokë, ndalet në rrjetë edhe pas një hutimi të Avdylit. Festojnë bardhezinjtë, shfryjnë tifozët vendës në shkallët e stadiumit. Lojtarët e Kamzës ngarkohen psikologjikisht dhe Zguro këshillohet nga kryesori, pasi dueli i tij me Frashërin acarohet. Gjithsesi, kryesori tregohet i kursyer në kartonë. Të besuarit e trajnerit Ahmataj e kanë të vështirë të rrezikojnë portën e Selmanit me Filin që spostohet si sulmuesi i deklaruar, por që mbyllet mirë nga mbrojtja mike. Gjuajtjet e Zguros nga distanca nuk mjaftojnë, ndërsa kurbinasit menaxhojnë rezultatin dhe ia dalin ta mbyllin këtë pjesë të parë në avantazh.
PJESA E DYTË - Kur pritej që Kamza të reagonte me shumë forca në këtë fraksion të dytë të takimit, një gjë e tillë nuk ka ndodhur. Vendësit duken të lodhur në fushë dhe aksionet e tyre, nuk janë konkrete, pra lojtarët harxhojnë shumë energji larg portës kundërshtare. Gjithsesi,
Selmani do t'i tregojë aftësitë e tij në minutën e 69të, duke grushtuar një krosim të rrezikshëm të Malajt. Por, pikërisht atëherë kur nuk pritej, Kamza përfiton nga një hutim i mbrojtësve të Laçit dhe pesë minuta nga fundi Rezi vendos
baraspeshën. Në stadium nis festa, e cila nuk zgjat shumë. Kurbinasit hidhen në sulm dhe një minutë nga koha e rregullt, Xhixha i harruar nga mbrojtësit vendës, përballë portierit Avdyli nuk e ka të vështirë që të shënojë golin e fitores.