Akuza për blerje lojtarësh trajnerit të Kombëtares dhe kreut të FSHF-së
Kamza dhe Vllaznia, luftë mediatike para dhe pas sfidës
Kamza dhe Vllaznia janë përfshirë në një luftë të ashpër mediatike gjatë ditës së djeshme, ku kamzalinjtë kanë akuzuar jo vetëm kryesorin e takimit, Eldorian Hamitin, por edhe trajnerin e Kombëtares së Femrave, Armir Grimën, se po blinte lojtarët e kryeqytetasve. Ndërsa pas ndeshjes, akuzat kanë qenë në drejtim të FSHF-së dhe kreut të saj. "Panorama Sport" ju sjell në mënyrë kronologjike akuzat e ndërsjella.
KAMZA, E SHTUNË ORA 00:15 - Skandal! Arbitri Hamiti, që disa javë më parë na masakroi në Korçë, vjen sërish të na arbitrojë ndaj Laçit... Hamiti nga Lezha, komshi i shkodranëve, duhet të kalojë nga Laçi që të mbërrijë në Tiranë e të na arbitrojë ne. Janë thurur skenarë të zinj ndaj Kamzës. Por Kamza luan në fushë dhe s'merret me matrapazët drejtues nga Shkodra, që kujtojnë se blihemi me para. Respekt për sportdashësit e vërtetë shkodranë, por jo për sekserët që e shkatërruan ekipin e tyre e tani duan të bëjnë të njëjtën gjë me ekipin tonë. Me në krye Grimën, hajdutin me çizme që ndër vite ka bërë pazare me portën e tij, kanë ofruar lekë për të blerë lojtarët tanë. Por nëse Grima shitet me para dhe ka një çmim, Kamza nuk ka çmim dhe është e pashitshme. Ftojmë tifozët të na përkrahin.
VLLAZNIA, DJE ORA 10: 00 - KF Vllaznia është e detyruar të reagojë pas akuzave të shpërndara nga FK Kamza, të cilat cenojnë rëndë imazhin e Klubit dhe të futbollit shkodran. Asnjëherë nuk kemi dashur të merremi me të tilla deklarata dhe gjithmonë i kemi injoruar. Por reagimet nga FK Kamza prej 6 muajsh nuk kanë qenë aspak të hijshme me deklarata të qëllimshme të drejtuesve të saj, duke anatemuar gjithnjë Vllazninë. Kjo nuk është aspak e drejtë sepse Klubi ynë nuk është marrë asnjëherë me kundërshtarët. Deklarata e fundit e bërë mbrëmjen e djeshme, është shumë e rëndë. Të gjithë e dinë që KF Vllaznia është një klub që funksionon me buxhet të miratuar nga Bashkia Shkodër dhe tentativa të tilla, siç thotë klubi i Kamzës, as nuk mund të mendohen. Përpos të gjithë këtyre gjërave, ajo që na habit është se FK Kamza, që një natë para ndeshjes së saj, e di kush është arbitri! Si ka mundësi një gjë e tillë, kur askush nuk e di emrin e arbitrit përveç kamzalinjve? Si ka mundësi që Hamiti konsiderohet "komshi i shkodranëve" nga drejtuesit e Kamzës, ndërkohë që ai është shpallur "non grata" prej javësh nga Vllaznia! KF Vllaznia u bën thirrje publike drejtuesve të Kamzës të ndalin gjuhën e shpifjeve dhe trillimeve të nisura prej javësh dhe të shohin punën e tyre sepse kjo nuk është në të mirën e futbollit shqiptar, nuk është në të mirën e dy qyteteve.
KAMZA, 1 ORË PARA NDESHJES - "Mos u mendo
hiç o Hamit! Mbaje mirë sot, mos u tall me Kamzën dhe kamzalinjtë. Ti je një herë me shenjë të zezë në fytyrë, kur rrezove Tiranën nga Superiorja. Mos e përsërit gabimin sërish se nuk ta fal kush kësaj here...
KAMZA, PAS NDESHJES - Kamza 1- 2 Kamikazi Hamiti. Arbitri i porositur për të fërshëllyer sa herë që balerinat e ekipit kundërshtar shtriheshin në fushë. Kampionat pazaresh e dhuratash. Vazhdojmë në ndeshjen e fundit.
Kamza, dje ora 20:00 - Kur kampionati bie në dorë të Përparimit, Mandit dhe Ardianit. Tallavaja e futbollit shqiptar
nuk ka të ndalur, dhurata dhe tolerime pafund, kamikazë etj. Skenarë të denjë për filma horror, skena që trembin fëmijë, femra apo tifozë e si rrjedhojë sjellin shkallë të mbushura më shumë me policë se me njerëz. Si mund të transmetosh në televizor një teatër në fushë të blertë? A kanë cipë gazetarë e analistë që dalin në televizor e analizojnë shfaqje teatrale? Çfarë ka diktatura më pak se ajo që po i bëjnë këtij kampionati? Ne do luftojmë deri në fund, të gjithë bashkë, lojtarë, staf, tifozë.