Teuta, “tenis” për mbijetesën
Skuadra e Begesë e kthen në "seancë stërvitore" kundër lagunarëve
Teuta e siguroi edhe matematikisht mbi jetesën këtë edicion duke mposhtur me goleadë Lushnjën, që është kthyer në një 'mace e zezë' për bregdetarët. Ndeshja nuk pati shumë histori me durrsakët, që nuk e diskutuan për asnjë moment fitoren duke kaluar që në start në avantazh. Lushnja për një moment krijoi përshtypjen sikur do të rezistonte deri në fund, pasi barazoi brenda pak minutash, por vetëm kaq. Madje, goli i Sefës 'egërsoi' bregdetarët që shpërthyen duke shënuar edhe pesë herë të tjera. Për herë të parë këtë sezon te Teuta shënojnë të dy qendërsulmuesit ( Latif, Peqini) dhe bregdetarët e kthejnë ndeshjen në ' seancë stërvitore'. Edhe pse mbështetja e tifozëve pritej të ishte e madhe në këtë takim, duke ditur rëndësinë e ndeshjes, atmosfera ishte e vakët, teksa edhe tifo-grupi "djemtë e detit", nuk ishin prezentë në stadium.
PJESA E PARË - Teuta e nis në sulm duke kaluar në avantazh, që në minutën e parë me anë të Amadu Latif, i cili ktheu në gol asistin e Gjorgjievskit. Goli çliron vendësit, por Sefa u ' prish' festën brenda katër minutash duke vendosur baraspeshën. Teuta nuk kënaqet me rezultatin dhe hidhet në kërkim të avantazhit. Pas një aksioni të shpejtë Çyrbja kroson në zonë për Beqjan, i cili nuk fal duke mposhtur portierin Betja. Goli u jep qetësi vendësve, që administrojnë lojën dhe pak para fundit shënojnë edhe golin e tretë me anë të Latifit,i cili bëhet golashënuesi më i mirë i bregdetarëve.
PJESA E DYTË - Edhe në këtë fraksion janë durrsakët ata që luajnë më mirë përballë një kundërshtari të dorëzuar dhe të rënë moralisht. Tripleta e shënuar në të parën u pasua nga një tjetër, por me të tjerë protagonistë. Fillimisht janë miqtë ata që provojnë, por tentativat e tyre nuk e shqetësojnë Kastratin. Teuta tenton me Hilën dhe Çyrben, por ai që shënon është Jurgen Peqini. Elbasanasi e nisi nga stoli këtë ndeshje, por brenda tri minutash realizoi dy herë, duke regjistruar dopietën e parë në Kategorinë Superiore. Të dy golat u nisën nga këmbët e Çyrbes, që zhvilloi një tjetër performancë të shkëlqyer me "djemtë e detit", ndoshta mund të jetë e fundit në sta- diumin "Niko Dovana", pasi interesi nuk mungon ndaj kapitenit. Miqtë ngushtojnë diferencën me anë të Ademit, por festivali i golave mbyllet me mesfushorin Ardit Hila, i cili ktheu në gol një 11-m të fituar nga po vetë ai.