Daja: Bëra histori me Skënderbeun, por dua ta mbyll sezonin me Kupën
Trajneri: Keqardhje për Vllazninë, Shehi është lojtar model
Festa për titullin kampion është më e madhe sesa keqardhja për rënien e Vllaznisë. Në fund të fundit, diçka e tillë konsiderohet legjitime. Ilir Daja shpreh emocionet e këtij sezoni dhe thotë se do të tentojnë ta mbyllin me Kupë. "Çdo shqiptar është i lidhur me futbollin, i vjen keq që ai që duhet djepi i futbollit shqiptar nuk është në Superiore. Por, kjo le t'i shërbejë Vllaznisë për t'u riformatuar që ta shohim rivale në kampionatin shqiptar", tha fillimisht Daja për "SuperSport".
SEZONI- "Bëmë histori, si asnjë klub tjetër shqiptar sepse kaluam 4 ture. Por duhet të mendojmë për ' qershinë' mbi tortë që është fitorja e Kupës së Shqipërisë. Jam i lumtur për titullin kampion".
PUNA- "Është e vështirë të flasësh për vetën sepse unë jam i bindur se çelësi i suksesit është bashkëpunimi, duke filluar që nga presidenti që ka ruajtur boshin e ekipit dhe është plotësuar me lojtarë të tjerë. Secili individ punon me të njëjtin qëllim dhe qëllimi është për trofe".
VITI I KALUAR- "Do ta ndaj pak vitin e kaluar me këtë aktualin. Unë e mora drejtimin e Skënderbeut në
fillim të janarit dhe kemi pasur diferencë me Kukësin dhe Partizanin. Por ditëm ta përballonim me qetësi edhe pse bëmë ndonjë hap fals".
TË URITUR- "Është e natyrshme që është e vështirë sepse, nëse Skënderbeu del në vendin e dytë, quhet dështim. Nëse merr kampionatin quhet një objektiv që duhej me detyrim. Ajo që më ka lehtësuar punën është bashkëpunimi i lojtarëve me eksperiencë. Ata nuk
kanë qenë të ' dehur' apo të ngopur, por donin të fitonin sërish".
HUMBJET- "Do të thosha që nuk kemi pasur 8 humbje sepse humbëm disa ndeshje ku nuk kishim shumë përgjegjësi dhe kampionati ishte i mbyllur. Politika e klubit është që të aktivizojë të rinjtë dhe duhet t'u jepja minuta. Skënderbeu nuk punon për momentin, por edhe për vazhdimësinë. Por, secili lojtar do mbajë përgjegjësi për
sjelljen në aspektin teknik në fushën e lojës".
KUPA- "Do të na pëlqente shumë që ta mbyllnim sezonin me një trofe dhe do të bëjmë të pamundurën që të fitojmë Kupën".
I ZGJEDHURI- "Janë disa lojtarë që përbëjnë boshtin kryesor të ekipit, por ai që do të veçoj është kapiteni Shehi. Ai i ka fituar të gjithë titujt me ekipin. Shehi vazhdon të jetë në formë të mirë dhe një lojtar i rëndësishëm".