Laçi e bën festë, një kualifikim si vend i 4-t

Uzuni bën dopietë, ndërsa Rexhinaldo e mbyll me 18 gola

Laçi e mbylli kampionatin me një fitore me goleadë përballë Teutës, që luajti me disa lojtarë të rinj pas objektivit të arritur një javë më parë kundër Lushnjës. Me këtë sukses, të besuarit e Mezanit siguruan pjesëmarrjen në Europa Ligë si vendi i katërt në kampionat. Në ndihmë të kurbinasve vjen rregullorja e FSHF-së, e cila parashikon që nëse klubi i shpallur kampion i Kategorisë Superiore fiton njëkohësisht edhe Kupën e Shqipërisë, në rastin konkret Skënderbeu, atëherë skuadra e renditur në vendin e katërt do të marrë pjesë në Ligën e Europës. Kësisoj, bardhezinjtë siguruan vendin e katërt dhe nëse nuk fitojnë Kupën e Shqipërisë, sërish e kanë të sigurt Europën. Një sukses i merituar për kurbinasit, që janë drejtuar nga Gentian Mezani me shumë profesionalizëm. Golashënuesi më i mirë i bardhezinjve për këtë sezon ishte Arturo Rexhinaldo, me 18 gola, ndërsa Uzuni e mbylli me 10.

NDESHJA - Loja nisi me ritëm, me sinjalin e parë që e japin durrsakët me Peqinin, por që gjithsesi ata që shënojnë janë vendësit me anë të Rexhinaldos. Afrikani mposhti lehtësisht

portierin Kastrati pas një gjuajtjeje me kokë. Teuta nuk pajtohet me rezultatin dhe e kërkon barazimin me Bilalin, i cili provon me një goditje të fuqishme nga jashtë zonës, por gjuajtja e mesfushorit devijohet në këndore. Edhe pse në avantazh kurbinasit janë ata që luajnë

më mirë dhe i afrohen disa herë golit, por kjo pjesë mbyllet me avantazhin minimal. Në të dytën fillon festivali i golave, me Teutën fillimisht që barazoi ndeshjen me anë të Peqinit, që shënoi golin e tretë personal në këtë kampionat. Goli u jep zemër bregdetarëve, por "irriton"

kurbinasit që shpërthejnë duke shënuar edhe tri herë të tjera me një Uzuni në super formë. Pas një aksioni model, Uzuni pason për Jonuzin, i cili nga jashtë zonës gjuan drejt portës dhe mposht portierin Kastrati. Uzuni ishte protagonisti i rikthimit të laçianëve te fitorja, pasi pas asistit të golit të avantazhit, ai shënoi edhe atë të qetësisë duke "dehur" mbrojtjen e durrsakëve. Brenda pesë minutash Uzuni kompletoi dopietën, duke blinduar fitoren e kurbinasve. Gjithsesi, miqtë nuk dorëzohen dhe shënojnë edhe golin e dytë me anë të Hilës, por vetëm kaq.