Vajzat kuqezi rikthehen me këmbë në tokë, i mposht Austria

Në një atmosferë të bukur sportive në pallatin e sportit "Feti Borova", në praninë e qindra spektatorëve të pranishëm në shkallët e impiantit, Shqipëria e femrave vinte plot entuziazëm pas fitores dhe lojës së shkëlqyer, që zhvilloi pak ditë më parë në Gjeorgji. Këtë herë skuadra jonë ka përballë një kundërshtar shumë më të fortë si Austria, e cila vinte gjithashtu në takimin e djeshëm, pas një suksesi në ndeshjen e parë. Por, me gjithë dëshirën e madhe, vajzat tona u dukën të lodhura në këtë ndeshje dhe nuk mundën dot t'i bënin ballë lojës së austriakeve, duke e humbur në fund përballjen me rezultatin e përgjithshëm, 3-0. Ndeshja - Seti i parë nis në ekuilibër, me skuadrën tonë që dhuroi një start optimist, duke kaluar në një avantazh të lehtë 12-10, por më pas loja e vajzave kuqezi pëson një rënie drastike dhe skuadra mike përfiton duke shënuar disa pikë radhazi dhe njëkohësisht edhe setin me rezultatin 25-18. Seti i dytë nis vrullshëm për austriaket që kalojnë menjëherë në avantazh 4-0 dhe kontrollojnë lojën deri në fund, duke e fituar edhe të dytin 25-17. Në këtë pikë, vajzat tona duken fare të pafuqishme, të dorëzuara. Gjithsesi, në setin e tretë edhe pse të lodhura, vajzat e drejtuara nga Altin Martiri përpiqen të reagojnë por do të jetë e pamundur, pasi edhe ky set do të fitohet nga austriaket, ndonëse me rezultatin e ngushtë 25-21 dhe të gjithë takimin 30. Ndeshja e radhës për skuadrën tonë do jetë në Izrael, përballë skuadrës vendëse, në datë 26 maj, në orën 19:00. FLET TRAJNERI MËRTIRI - Në përfundim të takimit, trajneri i kombëtares, Altin Martiri, tepër i zhgënjyer u shpreh: "Nuk ishte dita jonë, nuk arritëm t'i menaxhojmë mirë emocionet dhe gabuam shumë, duke i dhuruar shumë pikë skuadrës kundërshtare, e cila u tregua shumë më e kujdesshme se ne. Edhe pse nuk shfaqi ndonjë superioritet të madh karshi nesh, ajo arriti që të përfitojë më së miri nga gabimet tona dhe kjo vendosi fatin e ndeshjes".

Bici, E. Tuci, Marina, Thaka, Sejfullai, Sijoni / Prenga, Picaku, Rexhepi, Xheka, Kushi, Sijoni, M. Tuci, Shehi, Dodani Trajner: Altin Martiri

Duvnjak, Teufl, Bajde, Ëallner, Holzer, Chrtianska, Epure/ Deisl, Peischl, Maros, markovic, Schmit, Nesimovic Trajnere: Svetlana Iliç

Arzu Emiroglu ( Turqi), Endri Zguri ( Shqipëri)