Skënderbeu dorëzon kërkesën, të gjithë me sytë nga KAS-i
Futbollistët mbeten në ankth për të ardhmen
Te Skënderbeu është koha për në KAS. Pas festës "së çmendur" të titullit kampion, Skënderbeu duket se pret më së shumti lajme nga Gjykata e Arbitrazhit Sportiv në Lozanë, së cilës i ka kërkuar që të gjykojë në themel çështjen e trukimeve të pretenduara nga UEFA. Pas një pune voluminoze të bërë nga ana e përfaqësuesve ligjorë të Skënderbeut dhe zyrës së avokatisë, dje klubi ka dorëzuar pranë kësaj gjykate kërkesën për apelim të çështjes me pretendimet përkatëse. Pas apelimit pritet që të jetë radha e KAS-it, që të marrë në shqyrtim fillimisht kërkesën dhe më pas të bëjë rekursin e dosjes. Por, mbi të gjitha të dalë me një vendim ndoshta përfundimtar në lidhje me këtë situatë. Skënderbeu duket i bindur se duke qenë para faktit që KAS e gjykon në themel këtë herë dosjen dhe vendos mbi ligje e jo mbi hipoteza, kësaj radhe do të marrë një lajm pozitiv. Gjithsesi, koha për një përgjigje përfundimtare është e largët edhe për faktin se çështja do të zgjasë të paktën deri në muajin nëntor. Bardhekuqtë më shumë se te vendimi final e kanë mendjen tek e ardhmja e sezonit në Champions. Për këtë, KAS ka gati kërkesën e dërguar nga klubi dhe pritet që të vendosë në ditët e para të muajit qershor, nëse Skënderbeu do të lejohet të marrë pjesë në Europë apo jo. Kjo do të jetë edhe periudha e mbushur më me ankth për klubin bardhekuq.
Kontratat e lojtarëve- Të gjithë e presin me padurim lajmin që do të vijë nga Gjykata e Arbitrazhit në Lozanë, por më së shumti janë lojtarët ata që kërkojnë të mbushin mendjen përfundimisht nëse
do të shijojnë aventurën europiane edhe këtë sezon. Kjo duket se i mban disi në ankth futbollistët e Skënderbeut për të ardhmen, sidomos ata që janë pa kontrata në këtë pikë të sezonit. Pritet që kur të vijë lajmi i radhës nga KAS, të merret edhe vendimi për të ardhmen e lojtarëve ose të paktën atyre që duan të qëndrojnë te Skënderbeu, edhe nëse mund të jenë pa Europë deri në fund të vendimit të KAS-it. Pak a shumë, kjo është situata në kampin bardhekuq, atje ku drejtuesit e Skënderbeut janë sy e veshë nga Lozana për të mësuar fatet e sezonit të ri. Shorti i Champions-it hidhet më 19 qershor dhe deri atëherë do
të jetë konfirmuar nëse Skënderbeu do të luajë në Europë këtë sezon apo jo.
Përgatitjet për KupënPas festës së titullit Skënderbeu është grumbulluar në Durrës për finalen e Kupës me Laçin, takim që luhet nesër. Nën urdhrat e trajnerit Daja, bardhekuqtë kanë filluar përgatitjet me një seancë të lehtë. Sot pritet që ngarkesa të jetë maksimale për të qenë gati për finalen. Ekipi do të qëndrojë i grumbulluar në rezidencën e tij në Durrës deri nesër dhe do të punojë intensivisht për të marrë trofeun që i mungon klubit. Të dielën ekipi do të niset drejt Elbasanit për të luajtur takimin e fundit në këtë sezon.