Partizani “peshkon” në Korçë, largohet Preiti
23-vjeçari është një nga zbulimet e sezonit të fundit, por joshet nga disa klube lindore
Jasir Asani rezultoi si një nga goditjet më të mira të kryer nga Partizani në dy merkatot e sezonit të shkuar. Para disa javësh u përhap lajmi se Asani mund të largohej nga "demat" pa e mbushur vitin, pasi për 23vjeçarin nga Shkupi kishte interesim nga disa klube të Lindjes. Asokohe u tha se sulmuesi i të kuqve kishte rënë në syrin e klubeve nga Azerbajxhani dhe Kazakistani që i ofronin një rrogë të majme dhe që ishin të gatshëm të paguanin edhe klauzolën e largimit para kohe të lojtarit, shumë e cila është 400 mijë euro. Por, drejtuesit e Partizanit janë të interesuar që ky transferim të mos ndodhë, pasi Asani është në planet e klubit, ndaj po bëjnë të pamundurën që t'i bëjnë bllokadë largimit. Shifra 400 mijë euro nuk i tundon "demat", të cilët preferojnë më mirë që ta kenë pjesë të skuadrës Asanin edhe për sezonin në vazhdim. Por, nuk është e thënë që Partizani të ndryshojë mendje për ndonjë ofertë që mund të ishte afër dyfishit të klauzolës që e mban të lidhur me kryeqytetasit. Jasir Asani është një nga zbulimet e sezonit dhe ka qenë përforcimi i fundit që bëri Partizani në merkaton e verës së kaluar, ku më 22 shtator 2017 firmosi një kontratë katërvjeçare. Në kontratën e nënshkruar është shënuar edhe një klauzolë për
një largim të parakohshëm të lojtarit. Palët kanë rënë dakord që Asani mund të largohet para përfundimit të kontratës nga Partizani, nëse paguan 400 mijë euro dëmshpërblim. Kjo quhet shifër e konsiderueshme, pasi Partizani nuk pagoi për ta afruar sulmuesin
nga Shkupi. Sipas kësaj klauzole, shifra 400 mijë euro është e gjitha për Partizanin, ndërsa menaxheri i lojtarit mund të përfitojë nga shitja vetëm nëse oferta e kalon këtë kuotë. Klubi dhe menaxheri kanë rënë dakord në kontratë që në rast shitje mbi 400 mijë
euro, diferenca do të përpjesëtohet në dysh mes palëve. Pra, menaxheri është i interesuar që të gjejë një ofertë të majme, në mënyrë që të rrisë edhe fitimet e tij nga shitja e mundshme e Jasir Asanit para përfundimit të kontratës me "demat".