Largohen Ahmataj dhe Nikaj, Kamza do një boshnjak

“Pjesëtarëve të stafit do u komunikoj largimin, në të ardhmen do jetë një ekip tjetër”

Sinan Idrizi e cilëson tejet të dështuar se zonin që sapo u mbyll. Në një prononcim të dhënë dje për "Panorama Sport", administratori njofton se do të ketë revolucion. Në pjesën e dytë të sezonit, sipas Idrizit, Flamurtari ishte një tmerr i vërtetë. "Ne kemi dështuar në këtë sezon. Ne synojmë që të bëjmë më të mirën për tifozët tanë. Dhe ata nuk kanë faj, ndërsa na kanë mbështetur maksimalisht gjatë të gjithë kampionatit. Problemi nuk është te tifozët që na mbështesin, por tek ato që nuk po arrijmë të bëjmë dot ne. Në fushë në fazën e dytë ekipi ishte një tmerr i vërtetë, pavarësisht arbitrimit. Ne nuk i kënaqëm dot tifozët dhe kjo është një histori dështimi e jashtëzakonshme", tha fillimisht Idrizi. MASAT

Administratori Sinan Idrizi deklaron se do të ketë masa drastike për këtë dështim. Idrizi tha se do të thërrasë të gjithë stafin për t'u komunikuar se janë të lirë dhe të shikojnë punën e tyre. Sipas Idrizit, kjo masë vjen për shkak edhe të përfundimit të kontratës së administrimit të klubit nga turqit në muajin korrik. "Ky dështim i madh do të na detyrojë të marrim masa drastike. Është viti i katërt që unë jam këtu dhe po dështojmë. Edhe ky është sezon i dështuar dhe ky është fakt. Masat drastike do t'i shikoni. Kontrata ime mbaron në fund të korrikut. Në ditët në vazhdim unë do të njoftoj të gjithë stafin që i jap fund bashkëpunimit me

ta. Gjithë stafit të Flamurtarit, të gjithë punonjësit që janë këtu të shikojnë punën e tyre. Meqë kontrata ime merr fund në korrik, jam i detyruar t'u them që të gjithë të marrin masa. Me një pjesë të tyre edhe mund të përsëritet prapë, por me një pjesë tjetër jo. Por, nga ky moment kjo është situata jonë", u shpreh administratori. Ardi Behari, Vangjel Laluci, Ardian Ciruna, Petraq Bifsha, Bejkush Birçe dhe Vasil Ruci janë pjesëtarët e stafit të Flamurtarit që do të shkarkohen. SEZONI I RI

Sinan Idrizi deklaron se me nënshkrimin e kontratës së re do të ketë të tjera objektiva. Idrizi tha se nuk do të ketë më Flamurtar të këtij niveli, ndërsa paralajmëron afrime të reja në staf dhe në radhët e lojtarëve.

"Në kontratën e re që do të nënshkruajmë për administrimin e klubit nëse do ta kemi ne apo ndoshta të tjerët, do të kemi situata të tjera. Do të kemi histori të tjera, do të kemi një ribërje tjetër. Do të kemi afrime të tjera në staf dhe te lojtarët,

po ashtu do të kemi synime të tjera dhe buxhete të tjera. Kur flas për anë drastike, e kam për tjetër gjë, që nga buxhetet, e etj. Nuk do të kemi një Flamurtar që të jetë i këtij lloj niveli", përfundon prononcimin e tij, administratori Idrizi.