Rinovimi duket larg, Lika: Fjalën e fundit e ka... Tavo
Luftëtari/ Trajneri: Kontrata mbaron, pres presidentin
Pas suksesit historik të Luftëtarit në sezonin e fundit, ku e mbylli në vend të tretë dhe siguroi pjesëmarrjen në Ligën e Europës, në klubin gjirokastrit ka dilema për vazhdimësinë e trajnerit Hasan Lika. Ky i fundit e mori skuadrën në një moment të vështirë, por arriti atë që ndoshta nuk mendohej kurrë, të paktën në fazën e parë. Katër ditë pas përfundimit të kampionatit, ende nuk dihet nëse Lika do të vazhdojë të drejtojë Luftëtarin edhe në ndeshjet e Ligës së Europës. "Panorama Sport" mësoi dy ditë më parë se drejtuesit e klubit janë të dyzuar për çështjen e pankinës, edhe pse nuk mund të flitet me siguri. Dihet që presidenca bluzi u beson shumë agjencive të huaja, teksa në këto dy vite ka bashkëpunuar jo vetëm për afrimin e lojtarëve, por edhe për ardhjen e trajnerit Mlladen Milinkoviç. Tashmë nuk përjashtohet mundësia që të kemi sërish një ndryshim kursi, edhe pse ndoshta mund të duket si absurde, për më tepër që Hasan Lika arriti diçka të paimagjinueshme në krye të Luftëtarit. Në këtë moment, një gjë është e sigurt: drejtuesit janë në dyshim. Pra, të vazhdojnë me Likën apo t'i besojnë një trajneri të
huaj, ndoshta edhe si rezultat i bashkëpunimit me agjenci menaxhimi. Në ditët e ardhshme do të vendoset gjithçka, por duket se gjasat janë që Luftëtari të ketë më 12 korrik, kur dhe do të luajë ndeshjen historike në Ligën e Europës, një trajner tjetër dhe jo Likën.
REAGIMI - Gazeta kontaktoi dje vetë trajnerin Hasan Lika, i cili për rinovimin e kontratës ia kaloi "topin" presidentit Tavo. "Jam nën kontratë me klubin e Luftëtarit deri në fund të këtij muaji. Do të ulem me presidentin të bisedojmë për të ardhmen në
ditët në vazhdim. Nëse rinovoj ose jo, mendoj se fjalën e fundit e ka presidenti Tavo. Është ai që vendos", ka thënë dje Lika për "Panorama Sport". Ndërkohë, në ditën e festës me tifozët që u bë në Gjirokastër pas sigurimit të pjesëmarrjes së Luftëtarit në Ligën e Europës, i pyetur nga mediat lokale për të ardhmen, trajneri kryeqytetas, ndër të tjera, u shpreh se gjithçka mund të ndodhë. "Çdo gjë është e hapur dhe çdo gjë mund të ndodhë, pavarësisht se jemi në Gjirokastër". Tomor Shehu