Apolonia kërkon trajner, ja kandidaturat
Nga Demiri te Papuçiu, zbardhen alternativat për stolin
Fundi i këtij muaji do të zbardhë dhe një fakt të rëndësishëm për Apoloninë: emrat e lojtarëve që nuk do të jenë më pjesë e skuadrës për sezonin e ardhshëm. Së paku, grupi i parë, pasi lëvizje mund të ketë edhe më vonë, në varësi të interesave të skuadrës. Ndonëse qarkullojnë emra dhe ka informacione nga brenda klubit për kontingjentin që do të largohet, ne po respektojmë etikën e kërkuar nga përfaqësuesit zyrtarë të fierakëve dhe për kortezi të marrëdhënieve me futbollistët e duke pritur fundin e muajit. Gjithsesi, thelbësorja informative e këtyre ditëve është ambicia herë e hapur dhe herë e fshehur që klubi fierak ka për të ndërtuar sezonin e ardhshëm një skuadër më të fortë se ky kampionat që lamë pas. TRAJNERI
Një tjetër interes, madje parësor dhe thelbësor për krerët e klubit, mbetet pankina. Fierakët e kanë vlerësuar drejtimin provizor të Mariglen Kules në 4 javët e fundit të këtij sezoni, por njëherësh kanë respektuar dhe vendimin e tij. Kule, sa duket, nuk është ende gati për një sfidë të re me Apoloninë dhe ai ka preferuar më mirë pozicionin e përgatitësit fizik, pavarësisht se në rastin më të keq Kule pati deklaruar se do të ishte i gatshëm të sakrifikonte për skuadrën. Edhe në këtë drejtim, fierakët po shkojnë drejt finalizimit të emrit që do t'i besohet "timoni" i Apolonisë për sezonin e ardhshëm dhe emri pritet të bëhet i ditur këto ditë të fundit të muajit. Kanë qenë të shumtë emrat që janë lakuar si kandidatura të mundshme për të qenë trajner i Apolonisë, duke nisur që nga Dhimitër Papuçiu, Elidon Demiri, Marjol Miho, Roland Mehmeti etj., madje nuk kanë munguar dhe alternativa nga tregu ballkanas, por që fierakët janë skeptikë në këtë lloj piste dhe mbeten "partizanë" të tregut vendës, të cilët e njohin mirë dhe profilin e mentalitetin e Apolonisë. Nga burimet e sigurta brenda klubit, emri i kryetrajnerit të ri mbetet punë ditësh dhe duket se do të jetë ai që do ketë një rol determinant në organikën e skuadrës së re, nisur dhe nga objektivat që do të përcaktohen.