Calja: Ky ishte viti im, tani dua Botërorin
Triumfoi edhe në Kupën e Shqipërisë, Brikeni: Ia dedikoj familjes sime
Dy ditë më parë u dhanë verdiktet në Kupën e Shqipërisë 2018 në peshëngritje, ku fituese doli skuadra e Partizanit për femra dhe Tirana për meshkuj. Ndërkohë, sportistët më të mirë u shpallën Sherjana Ruçi për kategorinë e femrave dhe Briken Calja për meshkuj, që është dhe kampioni në fuqi i Europës, me tri medalje ari të fituara në Kampionatin kontinental, që u zhvillua në muajin mars, në Rumani. Sportisti rekordmen nga Elbasani rikthehet të flasë pas suksesit të arritur edhe në Kupën e Shqipërisë, ku ngriti 319 kilogramë në dygarësh. Në një prononcim për "Panorama Sport", peshëngritësi kampion Calja u shpreh: "Kupa e Shqipërisë është një eveniment i rëndësishëm dhe jam shumë i lumtur që arrita të marr një rezultat pozitiv, pasi shpërblen stërvitjen dhe punën e kryer gjatë kësaj periudhe. Aktualisht po kaloj një formë të shkëlqyer dhe jam shumë i kënaqur me atë që po jap. Mos harrojmë që ky ka qenë një vit i jashtëzakonshëm për mua, me tri medaljet e arta që fitova në Kampionatin Europian dhe tani kam si objektiv kryesor Kampionatin Botëror 2018, pasi më mundëson pjesëmarrjen në Lojërat Olimpike "Tokio 2020". Gjithashtu, dua të bëj një falënderim për të gjithë ata që më kanë ndihmuar gjatë kësaj periudhe, duke filluar nga familja që është pjesë shumë e rëndësishme e rezultateve të mia dhe të gjithë sponsorët që më kanë mbështetur dhe shpresoj t'ua shpërblej me rezultate", përfundoi prononcimin sportisti elbasanas, që garon për skuadrën e Tiranës.
EUROLIGA / VOLEJ MESHKUJ