Skënderbeu, Gavazajn e do Shturm Graci
Në lojë për kosovarit janë edhe D. Zagreb e Kopenhagen. Soue ka pak shanse të qëndrojë
Enis Gavazaj mund të vazhdojë karri erën në kampionatin austriak, pikërisht te nënkampionët në fuqi, Shturm Grac. "Panorama Sport" zbulon ekskluzivisht se klubi austriak ka bërë një ofertë zyrtare dhe tashmë është Skënderbeu që do të shqyrtojë gjithçka, duke vendosur nëse do ta shesë lojtarin apo do të rezistojë në pritje të ndonjë alternative më të mirë. Gavazaj vjen pas një sezoni të kënaqshëm, duke qenë një nga pikat stabël të formacionit të Ilir Dajës në sukseset e mëdha që Skënderbeu arriti. Gavazaj kërkohet nga shumë ekipe, por duket më bindës janë austriakët e Shturmit. Në ditën e finales së Kupës, ishte drejtori sportiv, Haris Fakiç, ai që paralajmëroi se janë disa ekipe nga Austria dhe Kroacia në kërkim të mesfushorit kosovar. Mirëpo, gazeta mëson nga burime të sigurta se përveç Shturm Gracit, në lojë për mesfushorin që është grumbulluar së fundmi edhe me Kombëtaren shqiptare janë edhe dy klube të njohura, si kroatët e Dinamo Zagreb dhe danezët e Kopenhagen. Interesimi i tyre ka qenë konkret, por nuk dihet nëse kanë bërë një ofertë zyrtare në klubin bardhekuq. Menaxherët e Skënderbeut kanë pasur negociata edhe me klube turke e zvicerane për Gavazajn, por për momentin bëhet fjalë vetëm për interesim dhe vëzhgim në ndeshje për lojtarin. Dje gazeta ka tentuar të kontaktojë me Gavazajn për të konfirmuar
edhe më shumë rreth të ardhmes së tij, por ka qenë e pamundur, teksa lojtari i është bashkuar Kombëtares, duke zbatuar në këto kushte edhe urdhrin e Panuçit, që kërkon nga kuqezinjtë të evitojnë sa më shumë telefonat në grumbullim.
SOUE & CO - Nëse Gavazaj ka interesime nga ekipe të tjera dhe largimi i tij do të sillte të ardhura të shumta për Skënderbeun, e njëjta gjë nuk mund të thuhet për titullarë si Ali Soue, Sabien Lilaj dhe Gledi Mici. Dy të fundit mbyllin kontratën me
klubin korçar dhe rrezikojnë të largohen me parametra zero. Në varësi të vendimit të KAS për pjesëmarrje apo jo të Skënderbeut në Ligën e Kampioneve, pritet që pas disa ditësh klubi të nisë bisedimet për të rinovuar marrëveshjen me Lilajn dhe
Micin. Nga ana tjetër, golashënuesi më i mirë, Soue, që shkëlqeu këtë sezon me Skënderbeun, nuk është në dorë të korçarëve. Normalisht që kjo u prish disi punë bardhekuqve në tentativën për ta mbajtur sërish të huazuar nga Kievo. Do të ketë fillimisht tratativa mes palëve për të parë formulën e huazimit dhe mënyrën e mbajtjes së futbollistit, ndërsa nga ana tjetër, duhet që edhe vetë Soue të bindet që të qëndrojë në Korçë edhe për një sezon.
Ndryshe qëndron situata për Sabjen Lilajn. Drejtuesit bardhekuq duke parë skadencën e kontratës pritet që të ulen, pasi lojtari të rikthehet nga Kombëtarja për të rinovuar kontratën edhe për një tjetër sezon. Kjo do të bënte që Lilaj të mos largohej me parametra zero nga Skënderbeu. Një gjë të tillë e konfirmojnë burime zyrtare nga klubi bardhekuq, duke parë edhe ofertën zyrtare që i ka bërë direkt lojtarit klubi italian i Palermos.