Vllaznia, dy rroga gjobë futbollistëve
Zbardhet pika në kontratat e klubit Vllaznia, lojtarëve do u mbahen 2 paga Një muaj do u mbahet edhe pjesëtarëve të stafit pas rënies nga Superiorja, ja detajet
Klubi i Vllaznisë ka gjobitur të gjithë lojtarët e tij me nga dy rroga pas rënies nga Superiorja. U përfol se gjoba ndaj tyre mund të ishte me nga një rrogë, por klubi ka zbardhur klauzolën që kanë pasur lojtarët në rregulloren e brendshme të skuadrës. Në rast të rënies nga kategoria, lojtarët do të penalizohen me nga dy rroga gjobë. Drejtuesit e klubit më në fund kanë hapur edhe rregulloret për të ndëshkuar lojtarët si pjesë përbërëse e fajit për rënien e skuadrës në Kategorinë e Parë. Një gjë e tillë mësohet se i është komunikuar edhe vetë lojtarëve. Me sa duket, futbollistët e Vllaznisë tani do të marrin vetëm një nga tre rrogat që nuk u janë dhënë. Drejtuesit e klubit Vllaznia, pavarësisht vështirësive për të siguruar fondet në kohë reale dhe vonesave që kanë pasur në pagesa, duhet thënë se përgjatë të gjithë kësaj periudhe, kanë qenë tepër kor-
rekt me pagesat e bëra. Gjoba ndaj lojtarëve ishte e pritshme pas asaj rënieje të ekipit nga Superiorja.
STAFI TEKNIK
Gjoba me dy muaj rrogë për lojtarët nuk do të zbatohet për stafin teknik. Nga sa bëhet e ditur pas
dorëheqjes së teknikut Ernest Gjoka dhe stafit të tij, drejtuesit e klubit do t'i penalizonin ata me mbajtjen e rrogës së fundit, gjë e cila ishte shkruar edhe në kontratën e drejtuesve teknikë. Mirëpo, rregullorja që dje kanë hapur drejtuesit e klubit, duhet që të ishte unike edhe për stafin teknik. Megjithatë nga sa mësohet, një gjë e tillë nuk do të aplikohet edhe për pjesëtarët e stafit që kanë pjesën e tyre të fajit në rënien e skuadrës. Klubi i futbollit Vllaznia, me sa duket, veproi edhe në këtë rast me dy standarde. Ndryshe një vendim për lojtarët dhe ndryshe për stafin që u largua dy javë para përfundimit të kampionatit. Përveç reagimit të drejtuesve të klubit një ditë, pasi skuadra ra në Kategorinë e Parë, gjatë këtyre ditëve nuk ka pasur më reagime.