Berisha: E para ishte festë, matim forcat për Europianin

Në ndeshjen e fundit me Norvegjinë ishte i dëmtuar, por qëndroi në "ElbasanArena" për të ndjekur mes reshjeve të shiut takimin nga pankina. Etrit Berisha, gjatë konferencës për mediat, ka komentuar edhe ndryshimin mes "vëllazërores" së luajtur në Prishtinë dhe ndeshjes miqësore aktuale. Portieri i Atalantës është shprehur se kjo ndeshje shërben për të matur forcat para kualifikueseve të Europianit.

Sfida me Kosovën, si do të jetë këtë herë?

Herën e kaluar ishte një ndeshje shumë e bukur, megjithatë ishte në rrethana të ndryshme, pasi ne vinim nga kualifikimi dhe deshëm të bënim festë dhe ashtu ndodhi. Tani jemi duke u përgatitur për Europianin, për kualifikimet dhe me siguri duhet ta shohim si lojë që të na shërbejë për vazhdimin e rrugëtimit tonë.

Pas miqësores me Norvegjinë që u humb, si është atmosfera në Kombëtare?

Në Kombëtare vijmë me dashuri dhe gjithmonë mendojmë që të kontribuojmë për Kombëtaren. Për të gjithë është ndjenjë shumë e mirë që jemi këtu. Edhe pse është fundi i kampionatit, jemi në moment të mirë dhe duam ta shfrytëzojmë. Shpresojmë që të jemi sa më mirë në këto dy ndeshje që të arrijmë atë që duam, të përforcohemi si ekip. Shpresojmë që të dalim sa më mirë. Si i keni parë paraqitjet e fundit të Strakoshës, folët pas "Interit"?

Me Tomin flas shpesh. Nuk e pash ndeshjen me Interin se isha në udhëtim dhe në fund e pashë rezultatin dhe disa sekuenca, ku Tomas nuk kishte ç'të bënte më shumë. Zakonisht ne portierët zhgënjehemi më shumë kur bëhen gabime dhe në futboll ndodh. Por, edhe pse kanë humbur një ndeshje, nuk është fundi i botës.