De Vraj: Inter, s'doja të luaja
Sfida-Champions: Mendova të mos isha, klubi më donte në fushë
Pasi ka mbyllur në lot aventurën e tij te Lacio (ku nuk munguan polemikat për faullin e penalltisë ndaj Ikardit), De Vraj ka folur për herë të parë si lojtar i Interit. "Kam firmosur një kontratë pesëvjeçare me zikaltrit. Po pres me padurim që të nis", është shprehur 26-vjeçari për të përditshmen holandeze "Algemeen Dagblad". Mbrojtësi do i bashkohet Interit, pasi klubi milanez e mori me parametër zero nga bardhekaltrit: është ai përforcimi në mbrojtje për Luçiano Spaletin. LACIO-INTER
De Vraj është rikthyer edhe një herë te Lacio-Inter, e fundit e kampionatit, sfidë të cilën ka dashur ta shpjegojë: "Në prag të ndeshjes, i kisha thënë klubit se nuk kisha ndjenja të mira, se nuk do kisha mundur të luaja mirë. Por klubi më tha që më donte në fushë. Atëherë u përqendrova dhe u përpoqa të bëj më të mirën. Në fund nuk u mora me trazirat që u krijuan, u izolova totalisht".
CIKLI ZIKALTËR
Për De Vraj tani është momenti të përgjigjet mbi të ardhmen e tij zikaltër: "Nga klubet e shumta që më kanë kërkuar, Interi është ai që më pëlqeu më shumë: prej projektit, ambicieve dhe ndjesive që më la. Jam gati për një sfidë të re dhe ata ma ofruan". Holandezi nuk harron të komentojë eksperiencën në kryeqytetin italian: "Te Lacio kam kaluar vite shumë të bukura, mendoj se kemi bërë maksimumin me përjashtim të objektivit tonë të fundit: kualifikimin në Champions". KONTRATA
Pak deklarata ( por kuptimplota) të ish-lacialit, i cili
përfundoi në vorbullën e polemikave pas Lacio-Inter të 20 majit, në sfidën (e fituar 3- 2) që u siguroi Champions-in zikaltërve. Kontakti në zonë me Ikardin nuk u kapërdi nga tifozët lacialë, por tanimë është një episod,
të cilin De Vraj do mund të arkivojë. Së bashku me Azamoahn e Lautaro Martinezin (deri tani), holandezi po përgatitet për të nisur ciklin në Milano: pesë vite kontratë, me rreth 3,8 milionë euro si pagë sezonale.