Humbja ndaj Austrisë, ja çfarë duhet të ndryshojë te Gjermania

Pas humbjes 2-1 ndaj Austrisë në miqësore, trajneri Lëv lëshoi alarmin: "Nuk më shqetëson humbja, por mënyra sesi erdhi. Faji për humbjen është i yni", u shpreh Lëv. E qartë që skuadra e tij nuk dha atë çfarë priste kombi gjerman, kjo jo vetëm në rezultat, por edhe me mënyrën e lojës. Po çfarë u mungoi realisht "pancerave"? "Bild" ka analizuar situatën në skuadrën e kombëtares.

VAZHDIMËSIA - Në Klagenfurt trajneri Lëv miksoi disi formacionin duke lënë në hotel lojtarë të rëndësishëm si Humles dhe Myler. Toni Kros arriti vetëm dje në qendrën stërvitore në Epan, pasi ishte lënë pushim pas finales së Champions- it me Realin. Por Lëv duhet të aktivizonte formacionin më të mirë për t'i dhënë një identitet skuadrës vetëm një javë para kampionatit Botëror.

ATMOSFERË BOTËRORI - Disa nga yjet e skuadrës, si Sane dhe Gyndogan, nuk u panë shumë të fokusuar. Gjithashtu edhe veteranë si Khedira, Ozil dhe Hektor kishin mungesë entuziazmi gjatë lojës. Këtë e pohoi edhe Kimish para disa ditësh: "Nuk ka rëndësi se si rreshtohemi, por duhet të futemi të vendosur në dyluftime. Nëse secili nga ne do të japë maksimumin, atëherë do të funksionojmë mirë si skuadër".

ELIMINIMI I MUNGESAVE - Lëv ishte i bindur: "Humbëm shumë topa për minuta të tëra, kjo i dha siguri dhe forcë kundërshtarit". Është e qartë që kjo nuk mund të ndodhë në Rusi, gabimet mund të kushtojnë shumë në një turne madhor, pasi mund sjellin eliminimin e parakohshëm nga kompeticioni. RREZIKSHMËRIA PËRPARA PORTËS - Edhe në repartin e sulmit nuk pati ndonjë zhvillim gjatë lojës. Goli i Ozilit ishte më shumë një gabim i portierit kundërshtar. Gjermanët krijuan shumë pak në pjesën e parë dhe asgjë në 45 minutat e dyta.