Kristiano Ronaldo “djeg” Poçetinon, preferon Alegrin

CR7 snobon argjentinasin, e sheh jo ekspert për Realin

Të lënë "jetimë" nga Zinedin Zidan, pasi ky i fundit, vetëm disa ditë më parë, u dha lamtumirën, te Reali i Madridit tema kryesore është kërkimi i një trajneri, pas dorëheqjes së papritur të francezit. I preferuari i presidentit Florentino Perez është trajneri i Totenhemit, Mauricio Poçetino, i cili, ndërkaq, zbulohet se nuk pëlqehet nga Kristiano Ronaldo, "ylli" i skuadrës madrilene.

"STOP" I LEVIT - Sipas raportimit të bërë ditën e djeshme nga "Diario Gol", portugezi i ka thënë Perezit se do të largohet nëse argjentinasi bëhet trajneri i madrilenëve. CR7, në fakt, nuk mendon se Poçetino është në lartësinë e duhur për të drejtuar një ekip në nivelin e "Galaktikëve". "Fatmirësisht" për Ronaldon, presidenti i londinezëve, Daniel Levi, nuk dëshiron që trajneri i tij të largohet dhe e ka bllokuar me një klauzolë prej thuajse 50 milionë eurosh. Ndaj, me gjithë dëshirën e Perezit, marrëveshja me argjentinasin është e ndërlikuar ALEGRI E CO. - Gjithmonë sipas portalit portugez, Ronaldo shikon trajnerin e Juventusit, Masimiliano Alegrin, si më të përshtatshëm për stolin e "Los Blancos". Italiani ka fituar katër kampionate dhe katër Kupa të Italisë në katër vitet e tij në drejtim të Juventusit. E gjithashtu ka drejtuar bardhezinjtë në dy finale të Champions Ligë, një prej të cilave e ka humbur kundër Real Madrid në 2017-ën. Dy nga trajnerët e tjerë në listën e kandidatëve, sipas lajmeve të ditëve të fundit, janë Mishel Laudrup (ish-lojtar i Barcelonës dhe Realit) dhe, më i fundit, Raul Gonzales, ish-kapiten i madrilenëve.