Partizani sulmon Shulkun: Bën garë të paracaktuar

“Sistem pa integritet, nuk hyjmë te modelet tuaja të suksesit”

artizani prej vitesh është rreshtuar te klubet që bëjnë oponencë ndaj veprimtarisë së FSHF-së dhe kjo mund t'u ketë kushtuar në ecurinë e tyre. Klubi i kuq së fundmi ka reaguar në lidhje me deklaratat e bëra nga Sekretari i Përgjithshëm i FSHF-së, Ilir Shulku, në emisionin "Fair Play" të gazetares Enkeleida Zeko në "News 24". "Panorama Sport" kërkoi dje një reagim nga klubi në lidhje me analizën që ish-kapiteni i të kuqve, aktualisht Sekretar i Përgjithshëm i FSHF-së, i bëri problemeve që ka shfaqur Partizani në sezonet e fundit. Në reagimin e bërë enkas për "Panorama Sport" klubi ka shpërthyer ndaj Shulkut, të cilit i nxjerrin të gjitha "të palarat" e produktit që ai drejton. Sipas "demave", gara e organizuar nga institucioni që drejton Shulku është i telekomanduar, i shitur, i paracaktuar. Për të kuqtë, klubi e ka të vështirë që të ketë sukses në sistemin e ngritur nga FSHF, ku japin edhe tre shembuj të mbështetur nga ky institucion. Në fund, Partizani pyet Shulkun se cilat ishin arsyet që u dënuan me 2 milionë lek në fund të sezonit? Ja reagimi i Partizanit për "Panorama Sport":

"Ndoqëm me vëmendje prononcimin e Sekretarit të Përgjithshëm të FSHF-së në një prej emisioneve sportive dhe atë çka ai deklaroi, veçanërisht lidhur me ecurinë dhe organizimin e FK Partizanit në kompeticionet që organizon institucioni që drejton z.Shulku. Klubi dëshiron t'i përgjigjet z.Shulku, duke ia bërë të qartë për të disatën herë që Partizani në asnjë rast nuk ka kërkuar dhe as do kërkojë kurrsesi favorizime të asnjë lloj natyre në ecurinë e vet në garën sportive. Ajo që ne kemi kërkuar në çdo rast e vit pas viti ka qenë mbajtja dhe organizimi i garës nga ana e FSHF-së në mënyrë të drejtë e të paanshme. Meqenëse, z.Shulku ka marrë përsipër që të flasë në emër të të gjithëve për meritat dhe rezultatet e klubit Partizani, mendojmë se atij i takon në radhë të parë t'i përgjigjet bindjes së të gjithëve se gara e organizuar nga institucioni që ai drejton është e telekomandur, e stisur, e paracaktuar, e shitur dhe e blerë dhe shpesh herë edhe e politizuar. Nëse ai pretendon të kundërtën e kësaj bindjeje, le të pyesë veten e le të na thotë se përse produkti që prodhohet nga institucioni që ai drejton ka nivele mediokre besueshmërie e për rrjedhojë shikueshmërie. Le të pyesë veten e le të na thotë se përse rezultatet e ndeshjeve të caktuara parashikohen me saktësi të përpiktë shumë javë përpara se të luhen, e madje parashikohen që në start edhe fituesit e kampionateve, kupave, pjesëmarrësit në Kupat e Europës apo dhe ato ekipe që bien e ngjiten në kategori. Le të pyesë veten e le të na thotë përse stadiumet janë bosh kudo në Shqipëri, madje edhe kur hyrjet në to shpeshherë janë falas.

Me gjithë problematikat e ndryshme që klubi ynë ka pasur vitet e fundit në organizimin e vet të brendshëm, z. Shulku duhet ta dijë fare mirë që është e pamundur të ngresh një strukturë të suksesshme klubi dhe që të funksionojë në mënyrë eficiente për arritjen e rezultateve, brenda këtij sistemi. Sistem ku gara organizohet pa integritet, ku ka favorizime të njërës apo tjetrës palë, ku njëra palë goditet përmes trupës së arbitrave apo tinëzisht përmes Komisioneve të Disiplinës, si e si të mos marrë atë ç'ka i takon në fushën e lojës e tabelën e klasifikimit, ndërsa për palën tjetër shpesh bëhen "gabime njerëzore" në favor. Për këtë arsye s'ka se si emrat e mëdhenj apo trajnerët e huaj edhe me CV të rëndësishme që kanë ardhur në ekipe të caktuara vendëse të kenë pasur edhe mundësinë më të vogël për të qenë të suksesshëm, madje shpeshherë janë larguar edhe të llahtarisur nga ky realitet. Është e vërtetë që disa klube brenda sistemit të organizuar e drejtuar nga institucioni i Z. Shulku kanë stafe më të ulëta në numër se të FK Partizanit, por cilit prej këtyre modeleve suksesi t'i referohemi, atij që është bërë objekt leksionesh problemore nëpër Europë apo atij tjetrit që në strukturën e vet ka një përgjegjës "për marrëdhëniet tregtare me arbitrat e Komisionet e Disiplinës" ose dhe një përgjegjës tjetër me buxhet të caktuar për t'u futur "hajdutçe" brenda shtëpisë së tjetrit?! Së fundmi, dëshirojmë të pyesim z. Shulku, pasi zyrtarisht nuk na ka kthyer ende përgjigje: ' Për çfarë arsye FK Partizani u gjobit me 200.000 lekë, në ndeshjen e parafundit të këtij sezoni, vendim i cili u mor një ditë pas ndeshjes përmbyllëse të kampionatit?!'