Milinkoviç parakalon Tokiç për trajner
Që pas përfundimit të sezonit 2017-2018, të kuqtë mbeten në "ajër", pasi nuk mund të vendosin se çfarë plani pune do të ndjekin. Dihet që të kuqtë mbeten në pritje të vendimit përfundimtar që do të marrë UEFA për pjesëmarrjen e korçarëve në Kupat e Europës. Kjo javë pritet të jetë përcaktuese për të ardhmen e "demave" dhe caktimi i trajnerit të ri konsiderohet çështje orësh. Për momentin është krijuar një amulli sa i përket emërimit të trajnerit të ri të Partizanit. Mario Tokiç është përfolur prej javësh si më i mundshmi për të marrë drejtimin e "demave", por në ditët e fundit situata po vjen drejt përmbysjes. Burime pranë të kuqve kanë bërë me dije për "Panorama Sport" se ish-trajneri i Luftëtarit dhe Kukësit, Mladen Milinkoviç, e ka parakaluar kroatin në sprintin për të marrë frenat e "demave të kuq". Drejtuesit e klubit kanë zhvilluar së fundmi një raund bisedimesh me Tokiç, por palët kanë nisur të ftohen me njëri-tjetrin. Mësohet se trajneri kroat nuk ka qenë i bindur për të marrë përsipër drejtimin, për shkak të disa përplasjeve në ballafaqimin e planeve. Kontradiktat kanë nisur me merkaton, ku dihet që Partizani këtë vit ka një politikë të re pagash, duke ulur shpenzimet marramendëse që patën vjet. Gjithashtu, Tokiç nuk ka qenë i sigurt për të marrë përsipër kushtin e panegociueshëm të drejtuesve të kuq, fitimin e titullit kampion. Në kuadër të këtij skepticizmi, Partizani ka kontaktuar trajnerin Mladen Milinkoviç, i cili e ka pranuar ta marrë përsipër kushtin e fitimit të titullit kampion, si dhe evitimin e çmendurive me rrogat. Tjetër arsye pse e bën Milinkoviçin që të parakalojë trajnerin kroat është njohja e futbollit shqiptar.