Bashkia mendon shitjen e aksioneve të Lushnjës
Institucioni vendor mund të shesë 51% të aksioneve
Titullarët e Bashkisë së Lushnjës janë në tratativa për të shitur 51% të aksioneve, lidhur me kapitalin themeltar të regjistruar pas statutit të ri, që zotërohet nga Bashkia Lushnjë. Gazeta "Panorama Sport" ka mësuar se Bashkia e Lushnjës ka filluar të ndërmarrë hapat e para, pas sinjalit "sos" të shpenzimeve marramendëse për futbollin. Bashkia e Lushnjës është aksionerja e vetme e klubit të futbollit prej pesë vitesh dhe është vënë para përgjegjësisë si nga Asambleja e Përgjithshme e Aksionerëve ( Këshilli Bashkiak), specialistët e futbollit dhe dashamirësit e skuadrës, pasionantë të futbollit verdhejeshil. Vetëm për periudhën janar- prill 2018 për klubin e futbollit janë shpenzuar 170 milionë lekë të vjetër, çka solli dhe revoltën e anëtarëve të Asamblesë që kërkuan një informacion të detajuar për mbledhjen e 20 qershorit. Skuadra e Lushnjës vuan mungesën e një sponsori, gjë e cila ka sjellë mungesën e theksuar të rezultateve dhe në braktisjen e madhe të publikut. Në sezonin e fundit të Superiores verdhejeshilët humbën 29 nga 36 ndeshje të zhvilluara, duke zhvilluar sezonin më të dobët në historinë e tyre në elitë. Lushnja numëron deri më tani gjashtë futbollistë të larguar dhe dy të tërhequr nga futbolli. Ndërsa pjesa më e madhe janë të lëkundur ose në dilemë për të qëndruar ose jo në stadiumin "Roza Haxhiu". Mesfushori Erlind Korreshi ia ka lënë të ardhmes qëndrimin ose jo te Lushnja. Mesfushori 31- vjeçar pësoi një dëmtim të rëndë në gju në miqësoren që zhvilloi Lushnja në "Via Del Mare" të Leçes gushtin e kaluar. Alban Alushi