Lojtarë ‘mbipeshë’ në Rusi
Kejn futbollisti i dytë më i rëndë i Botërorit, Shaqiri më shtatshkurtri
Me listat e 32 ekipe ve finaliste të Botërorit që u dorëzuan në FIFA ditën e djeshme, tashmë ato shndërrohen në shifra të vlefshme për statisticienët. FIFA i ka shoqëruar emrat e 736 futbollistëve të Botërorit me peshën dhe gjatësinë e tyre, duke nxjerrë statistika tepër interesante.
ÇUDIT KEJN - Por shumë janë habitur kur kanë parë emrin e kapitenit të Anglsisë, Herri Kejn, në listën e lojtarëve më të rëndë në Rusi. Sulmuesi i Totenhemit peshon 98 kg, vetëm një kg më pak se mbrojtësi rekordmen i Panamasë, Roman Torres ( 99 kg). Për këtë arsye, 24vjeçari ka punësuar edhe një shef privat kuzhine për të rregulluar nivelin e kalorive që do marrë gjatë turneut, në mënyrë që të jetë në formë ideale për "Tre Luanët". Ndërsa futbollistët më të lehtë janë Takashi Inui i Japonisë, Havier Akinjo (Meksikë) dhe Mbark Bousoufa ( Marok), të cilët peshojnë vetëm 59 kg.
GJIGANTËT - Sa i përket gjatësisë, lojtari më shtatlartë do të jetë portieri kroat, Lovre Kaliniç, i cili shënon 2.02 metra gjatësi. Lojtari tjetër që i kalon 200 cm është Janik Vestergard ( Danimarkë), ndërsa mbrojtësi argjentinas Federiko Facio dhe portieri i Belgjikës, Tibo Kurtua janë të dy 1.99 m. Lojtarët më shtatshkurtër të këtij Botërori janë peruani Alberto Kuinter, Jahia Al- Sheri i Arabisë Saudite dhe nuk mungon as Xherdan Shaqiri i Zvicrës, që të tre 1.65 m. Skuadra më e gjatë e turneut është ajo e Serbisë me një mesatare prej 186.69 cm, duke lënë pas nordikët e Danimarkës me 186.6 cm. Por, këta të fundit mbajnë primatin e skuadrës më të rëndë sipas FIFA- s, me një mesatare prej 82.6 kg për lojtar.