Rafinja sot përshëndet Milanon, Interi studion planin për ta rikthyer
Rrugët e Rafinjës dhe Interit do ndahen zyrtarisht sot në mesnatë: 5 qershori 2018 është, në fakt, data e fiksuar për të ushtruar të drejtën e blerjes nga zikaltrit (35 milionë euro plus 3 si bonuse). Një shifër që Interi, siç u raportua edhe ditën e djeshme nga "La Gazzetta dello Sport", i ka komunikuar klubit katalanas se nuk do e paguajë duke shtyrë çdo diskutim për në korrik.
DËSHIRË - Do jetë një lojë diplomatike mes palëve dhe e shumta do varet nga "taktika" bindëse që do përdorin Rafinja dhe Mazinjo (babai-menaxher). Numri 8 i Interit është shndërruar, brenda pak kohësh, në një simbol të vërtetë për popullin zikaltër dhe në selitë milaneze e dinë mirë se rëndësia e brazilianit është e madhe. Veçanërisht në fushë, ku këmbët dhe inteligjenca e tij futbollistike e kanë shndërruar në një pikë referimi të lojës së Spaletit.
ZGJIDHJE - Interi, në krahun e tij, do kërkojë një huazim dyvjeçar me detyrim blerjeje për të bërë të mundur që pagesa mos përfshihet në bilancin aktual. Ndërsa Barça, pikërisht për faktin se Rafa tanimë është rikthyer
në ritmet e larta, mund të përdorë këtë "justifikim" për të luajtur me çmimin.
VENDIMTAR - I transferuar në Milano gjatë merkatos së janarit, debutoi më 28 shkurt në Ferrara kundër Spalit. Fillimisht, siç kujtoi vazhdimisht edhe trajneri zikaltër,
ishte grupi që e ndihmoi të rikuperonte formën fizike, pasi dëmtimi në gju e detyroi të kishte një kujdes më të madh në përgatitje dhe jo gjithmonë ka mundur të shtyjë me vazhdimësi. Më pas, rolet u shkëmbyen: nga momenti që rifitoi ritmin, ishte ai që ndihmoi
skuadrën. Nga Rafinja kujtohen lotët që i mbuluan fytyrën pas humbjes ndaj Sasuolos, që u "thanë" vetëm pas fitores në Romë kundër Lacios. "Mision i kryer", shkroi në "Instagram". Tani misioni do jetë një tjetër: rikthimi i brazilianit në Milano.