Tirana tenton Filin, Kukësi firmos me portierin e Kosovës
Afrimi i 27-vjeçarit i hap rrugën largimit të Koliçit, që i përfundon kontrata pas Europës
Portieri i Kombëtares së Kosovës, Faton Maloku, është zyrtarisht pjesë e Kukësit për sezonin 2018-2019. Ajo që gazeta bëri me dije ekskluzivisht në numrin e datës 30 maj, u konfirmua dje nga klubi nënkampion në fuqi i Shqipërisë. Portieri 27-vjeçar, që mbylli sezonin me Feronikelin në Superligën kosovare, kishte arritur në parim akordin që në fund të muajit të kaluar, por detajet e fundit ishin lënë për t'u diskutuar pas grumbullimit me Kosovën për miqësoren ndaj Shqipërisë. Dje portieri ka qenë në Tiranë, ku është takuar në zyrën e klubit të Kukësit me drejtorin sportiv, Nderim Nexhipi. Ky i fundit u bë shkes për afrimin e portierit, i cili shihet si kandidat potencial për të qenë titullar i Kukësit. Maloku është shpallur dy sezone radhazi portieri më i mirë i kampionatit kosovar. Ai ka firmosur kontratë 1vjeçare me opsion rinovimi dhe për një sezon tjetër. "Panorama Sport" zbulon se pagesa e tij është rreth 30 mijë euro në sezon. Trajneri Peter Pakult ka studiuar Malokun dhe është bindur. Maloku e ka zhvilluar karrierën
e tij te skuadra e vendlindjes, Gjilani, ndërsa dy sezonet e fundit ka qenë pjesë e Feronikelit, që mbylli kampionatin nën drejtimin e Sulejman Starovës.
KOLIÇI - Pas lëvizjes së fundit duket se marrëdhëniet e Kukësit me portierin Enea Koliçi janë prishur përfundimisht. Kuotat e pogradecarit bien ndjeshëm për të qenë pjesë e Kukësit edhe sezonin e ri. Pak ditë më parë, në një dalje publike, drejtori sportiv, Nderim Nexhipi, sqaroi se Koliçi do të vazhdojë të jetë pjesë e Kukësit. Gazeta mëson se portieri do të vazhdojë deri në përfundim të Kupave të Europës, pasi ashtu është edhe kontrata e tij. Mirëpo, sa i përket sezonit të ri, me shumë gjasa pogradecari do të ikë diku tjetër, pasi nuk ka pranuar të qëndrojë me ulje rroge. Koliçi ishte pa diskutim portieri më i mirë në Superiore në sezonin e titullit kampion të Kukësit, ndërsa gjatë kampionatit të fundit pati luhatje dhe humbi vendin në formacion. Për pogradecarin janë interesuar klube si Skënderbeu dhe Partizani. Pakult ka preferuar si titullar Stivi Frashërin, i cili në pjesën e dytë të sezonit të
kaluar bëri paraqitje të mira, duke bindur stafin. Kujtojmë që Kukësi ka bërë një lëvizje edhe në staf, pasi trajner portierësh nuk është më Gut Tafaj, i larguar në Amerikë, por Ermal Nexhipi. Ky i fundit ka qenë pjesë e stafit në kohën e serbit Mladen Milinkoviç.