Ja argumentimi Disiplinës për gjobën 7 milionëshe

"Panorama Sport" ka siguruar vendimin e fundit të Komisionit të Disiplinës, ku i argumentohen Partizanit arsyet e gjobitjes me 2 milionë lekë për shkak të sjelljes së tifozëve të kuq në transfertën e Vlorës më 19 maj. Ja vendimi argumentues i Disiplinës: "Vendim. Komisioni i Disiplinës i përbërë nga: Eno Bushi, kryetar, Sajmir Xhuglini, anëtar, Kujtim Pagria, anëtar. Në Tiranë më 04.06.2018, pasi mori në shqyrtim çështjen disiplinore që i përket Futboll Klubit 'Partizani', vëren se: Në ndeshjen Flamurtari-Partizani e vlefshme për javën e 35-të të Kategorisë Superiore nga zyrtarët e ndeshjes janë raportuar shkelje disiplinore, që lidhen me sjelljen e gabuar të tifozërisë së FK 'Partizani';

Më konkretisht, nga arbitri është raportuar: 'Në minutën 64-t, tifozëria e ekipit të Partizanit po ofendonin në kor në drejtim të FSHF-së'. Nga delegati është raportuar: 'Në minutën 64-t, tifozët e ekipit të Partizanit shan në kor me një fjalor banal në drejtim të FSHF-së'. Nga vëzhguesi është raportuar: 'Në minutën 64-t, tifozët e Partizanit thirrën në kore ofenduese me fjalë fyese në drejtim të FSHF-së'. Në bazë të parashikimeve të Nenit 96 të KDS, faktet që përmbahen në raportet e zyrtarëve të ndeshjes konsiderohen të sakta dhe të vërteta. Gjatë hetimit, Komisioni i Disiplinës nuk konstaton asnjë provë për pavërtetësinë e raportit të zyrtarëve, arsye për të cilat konkludon se nuk ka arsye për të vënë në dyshim sa është raportuar nga ta. Për më tepër, nuk rezultojnë mospërputhje midis raporteve të zyrtarëve. Në bazë të Nenit 95 të KDS-së, organet juridike kanë të drejtën ekskluzive në trajtimin, shqyrtimin dhe vlerësimin e provave të siguruara. Trupi gjykues i KDS-së, pas shqyrtimit të provave, ka arritur në përfundim se nga Futboll Klub 'Partizani' është konsumuar shkelja e parashikuar nga Neni 66/2 i KDS. Dispozitë, e cila parashikon se 'Personat juridikë, shoqatat dhe klubet mike janë përgjegjës për sjelljen e gabuar të grupit të tyre të spektatorëve, pavarësisht se faji mund të kryhet me vetëdije apo pa vetëdije dhe si rrjedhim dënohen me gjobë në çdo rast. Në rastet e shkeljeve të rënda mund të ndërmerren dënime të tjera me rastin e verifikimeve të ngjarjeve më të rënda. Nëse nuk provohet e kundërta, tifozët të cilët qëndrojnë në sektorin e miqve në stadium konsiderohen si tifozë ose mbështetës të ekipit mik'. Për sa më sipër, trupa gjykuese e Komisionit të Disiplinës pranë FSHF-së çmon se sipas nenit 66 të KDS përgjegjësia për sjelljen e spektatorëve bie mbi FK 'Partizani'".