Akuzat e Baballëkut: Të paaftët mbajnë peng Lushnjën

Ish-trajneri i Lushnjës, Ramadan Baballëku, ka kritikuar paraqitjet e Lushnjës në sezonin futbollistik që sapo u mbyll. Në një prononcim për "Panorama Sport", ai është shprehur: "Mendoj se ka ikur grinta dhe nuk përfaqësohen denjësisht ngjyrat e qytetit. Lushnja nuk ka pasur cilësinë e të mëdhave, por ka qenë një skuadër me grintë dhe ka luajtur me dinjitet në elitë. Sezoni që u mbyll ishte më i dobëti në historinë e futbollit lushnjar. Ka probleme në akordimin e fondeve, në menaxhimin e buxhetit. Nuk ka infrastrukturë dhe Akademia është një "show". Akademia fillon tek infrastruktura dhe jo te titulli, tek emri. Futbolli lushnjar duhet të riformatohet nga e para. Edhe me kosto. Themelore janë rezultatet dhe ato janë shumë të dobëta. Që nga skuadra e parë deri te moshat. Kush mban përgjegjësi për këto rezultate? Kush jep llogari? Ku dhe kujt ia jep llogarinë. Pas çdo sezoni ka një analizë sportive. Pse nuk bëhet? Jo vetëm që duhet të bëhet, por të jetë një analizë e gjerë, edhe me pjesëmarrjen e tifozëve. Nuk ka reagim për faktin që është hera e dytë që kemi një skuadër, e cila nga janari deri në maj merr vetëm tri pikë", tha fillimisht ai.

Akuzat - Sipas Baballëkut, ata që drejtojnë te Lushnja janë të paaftë. "Është domosdoshmëri të lëvizin nga themelet të gjithë strukturat e futbollit. Te Lushnja janë marrë peng nga paaftësia. Nuk janë njerëzit e duhur për të menaxhuar futbollin. Kemi një bord drejtues që është mbushur me burokratët e bashkisë. Një bord që duhet të përbëhet nga teknicienët e futbollit. Te Lushnja është unike, ku njerëzit që paguhen për futbollin nuk ndodhen në shkallët e stadiumit. Futbolli lushnjar është braktisur nga tifozët. Është e nevojshme që futbollit lushnjar t'i afrohen donatorë. Futbolli kërkon investime dhe përkushtim", është shprehur ish- trajneri. Alban Alushi