Portugalia u vodh dhe u kap me doping
Kombëtarja portugeze ka qenë pjesë e një skandali të gjatë në Kupën e Botës së vitit 1986. Ata u nisën drejt kompeticionit me shumë probleme. Në fillim, Veloso rezultoi pozitiv për përdorim dopingu, një ditë para nisjes. Më pas, udhëtimi ishte i lodhshëm dhe i gjatë, pasi ndaluan në Frankfurt dhe Dallas, para se të shkonin në Meksikë. Drejtuesit e ekipit kombëtar i kushtuan shumë vëmendje lartësisë ku do zhvilloheshin ndeshjet dhe e sistemuan ekipin në qytetin e Saltilos. Duke qenë se Vegasi nuk ishte shumë larg, lojtarët e kombëtares kërkuan leje që të shkonin për të bërë "shopping", por drejtuesit nuk i lejuan. Në një situatë të tillë, ata i dhanë të gjitha paratë nipit të një politikani, i cili ishte i deleguar në atë qytet, në mënyrë që të shkonte në Vegas dhe të blinte gjërat që ata donin. Gjithsesi, ai shkoi, por nuk u kthye më asnjëherë, duke përvetësuar të gjitha paratë. Këtu nisën edhe pakënaqësitë mes futbollistëve, të cilët patën shumë probleme edhe me njeri- tjetrin. Më pas, lojtarët u rebeluan për faktin se detyroheshin të vishnin veshje me logon e "Adidas"-it dhe të një firme birre, "Kristal", por nuk paguheshin për këtë gjë. Rebelimi i tyre arriti deri në atë pikë, sa nuk pranonin as të stërviteshin si duhet. Madje, gjatë një miqësoreje të organizuar me një ekip vendës, lojtarët filluan të talleshin. Sulmuesi Diamantino jepte intervistë për median, ndërsa zhvillohej ndeshja. Në sfidën e parë të grupit, kundër Anglisë, pritej që këta të fundit të përfitonin nga situata dhe të kryenin formalitetin. Mirëpo, një gol i Karlos Manuel u dha suksesin portugezëve me rezultatin 1-0. Në ndeshjen e dytë, portieri Bento pësoi një dëmtim të rëndë dhe vendin në formacion e zuri Damas, një nga portierët më të mirë në historinë e Portugalisë. Por, Bento e priti mjaft keq dhe kaloi në depresion. Kjo aventurë përfundoi në fazën në grupe, por duke parë incidentet e shumta që përfshinë portugezët, më mirë kështu...