Meta: I kisha firmosur shtetësinë shqiptare
Presidenti: Frymëzim për brezat e rinj
Vdekja e presidentit të Federatës Kosovare të Futbollit ka tronditur edhe Presidentin e Republikës së Shqipërisë, Ilir Meta. Nëpërmjet një postimi në faqen e tij në rrjetin social "Facebook", kreu i shtetit tregon se ndarja nga jeta e Vokrrit është një lajm shokues për të gjithë shqiptarët, që kanë ndjekur dhe adhuruar talentin e tij. Gjithashtu, Presidenti i Republikës tregon se pak ditë më parë pati kënaqësinë t'i firmoste shtetësinë shqiptare. POSTIMI I PRESIDENTIT META:
Ndarja e parakohshme nga jeta e legjendës së futbollit të Kosovës, Fadil Vokrri, është një lajm shokues për të gjithë shqiptarët që e kanë ndjekur e adhuruar shkëlqimin e talentit të tij si sulmues e golashënues i Prishtinës, por edhe ekipeve të njohura europiane të Partizanit të Beogradit, Fenerbahçes e madje edhe të përfaqësueses së ishJugosllavisë. Fadil Vokrri, me talentin dhe suksesin e tij, frymëzoi shumë fëmijë shqiptarë kudo për të ecur në shembullin e tij. Me personalitetin e tij ndërkombëtar ndihmoi integrimin e Kosovës në UEFA dhe FIFA. Pak
ditë më parë pata kënaqësinë të firmosja dhënien e shtetësisë shqiptare për Fadil Vokrrin me kërkesë të F.SH.F për kontributin e tij të veçantë në mbështetje të futbollit tonë e sidomos ekipeve kombëtare. Duke i shprehur ngushëllimet më të sinqerta familjarëve të Fadil Vokrrit,
Federatës së Futbollit të Kosovës, mbarë botës shqiptare të futbollit, jam i bindur se personaliteti i jashtëzakonshëm që ai krijoi në fushën e blertë do vazhdojë të frymëzojë gjeneratat më të reja në rrugën e suksesit!", ka shkruar kreu i shtetit në rrjetin social "Facebook".