Ramadani flet si kapiten: Luftëtari bind edhe në Europë

Shkodrani tregon për startin e përgatitjeve

Behar Ramadani pritet të jetë kapiteni i ri i Luftëtarit për sezonin 2018-2019. Mesfushori shkodran futet në vitin e shtatë të aktivizimit me gjirokastritët dhe tashmë mund të quhet si i shtëpisë. Kontrata e 28-vjeçarit është në fuqi deri në verën e 2019-ës, ndërsa pas largimit të Orjad Beqirit, tashmë shkodrani do të jetë kapiten i ekipit. Në një bisedë për "Panorama Sport", ai flet për startin e përgatitjeve dhe debutimin në Ligën e Europës. "Përgatitjet e tanishme kanë vlerë të dyfishtë, sepse na japin mundësinë jo vetëm të paraqitemi sa më mirë në turin e parë, por do të na shërbejnë edhe për fillimin e sezonit të ri. Një sezon më parë filluam stërvitjen më mbrapa se të gjithë dhe kjo ndikoi negativisht në ndeshjet e fazës së parë të kampionatit. Sa për ndeshjen e turit të parë të Europa Ligës është herë të flasim, përderisa ende nuk dimë se me cilën skuadër do të ndeshemi. Ka ekipe shumë të forta, por gjithsesi me pak fat në short, mundet që të favorizohemi për të kaluar turin e parë. Luftëtari e ka për herë të parë përfaqësimin në Europë dhe na duhet të nderojmë fanellën e kësaj skuadre. Duhet të japim maksimumin edhe për një arsye tjetër, atë të respektit që gëzojmë nga tifozëria gjirokastrite, por edhe përkujdesjes nga presidenti Tavo dhe gjithë drejtuesit e klubit. Ne që jemi sot pjesë e Luftëtarit nderojmë jo vetëm veten, por edhe të tjerët nëse duam që historinë dhe traditën e futbollit të këtij qyteti ta bëjmë të njohur edhe në Europë", - deklaroi shkodrani i Luftëtarit. Tomor Shehu