“Fenomeni” Izmir Smajlaj fiton tjetër medalje ari

Atletikë / Shkodrani kërceu 790 centimetra

Izmir Smajlaj shpallet kampion Europe në kampionatin e shteteve të vogla që u zhvillua në Lihtenshtejn. Atleti shkodran ka regjistruar një tjetër sukses ndërkombëtar në garën e kërcimit së gjati që u zhvillua ditën e djeshme. Sportisti ynë arriti të zërë vendin e parë në këtë turne, ku regjistroi një kërcim prej 7.90 metrash, duke arritur një rezultat shumë të mirë. Në këtë event atleti shkodran edhe pse garonte në një orar jo shumë të përshtatshëm, pasi gara zhvillohej në mesditë, kreu katër kërcime shumë të mira, duke arritur rezultatet 7.88 metra, 7.72 metra, dhe 7.70 metra në tre kërcimet e tjera dhe vetëm për një faull milimetrik humbi kërcimin 8.20 metra. Ndërsa, në vendin e dytë u klasifikua atleti gjeorgjian, Lasha Gulelauri, që regjistroi kërcimin 7.67 metra, me një diferencë jo të madhe nga atleti jonë. Në garën e zhvilluar në Lihtenshtejn mori pjesë edhe atleti tjetër shqiptar, Gledis Hallunaj, i cili u klasifikua në vendin e nëntë, duke regjistruar një kërcim prej 6.90 metrash. Megjithatë, duhet të themi se për atletin shqiptar, Izmir Smajlaj, rezultati i kësaj gare nuk është më i miri, pasi rekordi i tij është 8.08 metra ( rekord absolut për të, i cili e shpalli Kampion Europe, vjet në Beograd), por duhet konsideruar si një provë e vlefshme për aktivitetet e tjera ndërkombëtare, që do të zhvillohen gjatë kësaj vere. Turneu i Lihtenshtejnit kishte një pjesëmarrje të gjerë, pasi morën pjesë 19 shtete të ndryshme, në të cilin garuan 250 atletë në 11 disiplina.